Meeqqat Illersuisuat - MIO.GL
Meeqqat Illersuisuat

Aviâja Egede Lynge 40-nik ukioqarpoq, socialantropolog-itullu Edinburgh University-mi ilinniarnikuulluni. Aviâja perorsaanermut tunngasumik antropologiimi, ineriatorneq & ilinniarneq, inuiaqatigiinnermik ilisimatusaat aammalu attaveqaqatigiinneq Ilisimatusarfimmi ilinniartissimavai. Ilisimatusarnermut siunnersuisoqatigiit Global Leadership School of Indigenous Women ilaasortaaffigivaa aammalu Columbia University-mi Human Rights Advocates Program-mi ilinniarnikuullugu. Aviâja ilaquttanilu Nuummi najugaqarput. Aviâjap tunngaviusumik pingaartinnerpaasai tassaapput meeqqat tamarmik atugarissaarnissaat, nammineq kinaassutseqarnissamut pisinnaatitaaffik qanorluunniit tunulequtaqaraanniluunniit, taavalu ilikkartitaanissamut ilinniartitaanissamullu pisinnaatitaaffik.

Meeqqat Illersuisuat, Meeqqat pillugit Siunnersuisoqatigiit kiisalu Meeqqat pisinnaatitaaffiinik sullissiviat pilersinneqarpoq marsip aallaqqaataani 2012-imi, Inatsisartut inatsisaat nr. 11 ulloq 22. november 2011 naapertorlugu atulersinneqarmat Meeqqat Illersuisuat aamma Meeqqat pillugit Siunnersuisoqatigiit.

Meeqqat Illersuisuat Kalaallit Nunaanni siullersaalluni inissinneqartoq, siullertut suliassaralugu Naalagaaffiit Peqatigiivisa Meeqqat pillugit Isumaqatigiissutaat malillugu meeqqat inuusuttullu inuiaqatigiinni soqutigisaat isumannaatsumik siuarsaasumillu aallutissaat. Meeqqat Illersuisuat ukiuni pingasuni atorfinitsinneqarpoq, sivitsorneqarnissaanik periarfissaqartinneqarluni. Meeqqat Illersuisuanik atorfinitsitsiniarnermi atorfinitsitseriaaseq naliginnaasoq Naalakkersuisut qinersimavaat malinniarlugu, Ilaqutariinnermut, Peqqissutsimut aamma Ilinniartitaarnermut Naalakkersuisoqarfik aqqutigalugu ingerlanneqarsimalluni.

Meeqqat Illersuisuata iliuusissai:

  • Meeqqat inuusuttullu pisinnaatitaaffiinik aamma nimaarutaannik aqqutissaannik siunnersorlugit aqqutissiuullugillu.
  • Angajoqqaat meeqqat pisinnaatitaaffiinik aamma nimaarutaannik aqqutissaannik siunnersorlugit aqqutissiuullugillu.
  • Pisortatigut aamma namminerisamik sulliviutillit siunnersorlugit aqqutissiuullugillu.
  • Naalagaaffiit Peqatigiivisa Meeqqat pillugit Isumaqatigiissutaat naapertorlugu inatsisitigut isumannaatsumik meeqqat inuusuttullu sullinneqarnerat qulikkiissallugu
  • Pissutsit meeqqanut inuusuttunullu tunngasut nalilersussallugit
  • Meeqqanut inuusuttunullu tunngasunik paasissutissanik katersineq
  • Meeqqanut inuusuttunullu tunngasunik paasissutissanik ingerlatitseqqiineq
  • Inuiaqatigiinni oqallinnerni peqataaneq aamma meeqqat inuusuttullu kajumissaartarlugit peqataaqqullugit
  • Meeqqat atugarisaat nakussassarlugit suliniutinik siunnersuusiorneq

Meeqqat Illersuisuat inunnik ataasiakkaanik tunngassutilinnik aalajangersaasinnaanngilaq, kisianni oqaaseqarsinnaatitaavoq pisinnaatinneqarlunilu paasissutissanik meeqqat atugarisaannut attuumassutilinnut pisortani namminersortunilu sullissiviini isersinnaatitaalluni.

Meeqqat Illersuisuat, Meeqqat pillugit Siunnersuisoqatigiit kiisalu Meeqqat pisinnaatitaaffiinik sullissiviat nammineerluni ingerlasuuvoq taamaattumik pisinnaatitaaffeqarluni oqaaseqarsinnaatitaanermik. Meeqqat Illersuisuat Pisortanut naleqqiullugu pisussaaffeqarpoq meeqqat inuusuttullu nipaannik oqaaseqassalluni.