MIO-p meeqqanut isiginnittariaasaa - MIO.GL
MIO-p meeqqanut isiginnittariaasaa

MIO isumaqarpoq meeqqat inuttut inersimasut naligigaat, kisianni uagut inersimasutut meeqqat immikkut eqqarsaatigisariaqarigut.

Assigiinngiiaarneq nukittoqutitut isigaarput aammalu initussusermik peqarnissamut kaammattuilluta. MIO isumaqarpoq meeqqat immikkut pisariaqartitallit allatuulli pisinnaatitaaffeqartut, taannali aallaavigalugu immikkut pineqarnissaminnik pisariaqartitsisinnaasut, taava meeqqat tamarmik ajunnginnerpaamik aammalu assigiimmik toqqissisimasumik peqqinnartumik aammalu ineriartorfiusumik meeraanissaat naatsorsuutigineqarsinnaaniassammat. Meeqqat peqataanissaminnut pisinnaatitaaffeqarput, ataatsimuussusermullu ilaasussaatitaallutik meeqqat inersimasullu akornanni ataqatigiinneq eqqarsaatigalugu.

MIO isumaqarpoq inersimasut – angajoqqaat, sullissisut aammalu politikerit – meeqqanut akisussaaffeqartut aammalu qanoq inuunerinut akisussaaffeqarlutik. Angajoqqaat meeqqap toqqissisimasumik, peqqinnartumik aammalu ineriartorfiusumik meeraanissaanut akisussaaffimmik tigusisinnaanngippata, pisortat taanna akisussaaffik tigusariaqarpaat aammalu sukkasuumik suliniuteqartariaqarlutik meeqqap ajunnginnerpaamik pineqarnissaa qulakkeerniarlugu, inersimasuunngitsup. MIO isumaqarpoq siullermeerluni pasitsaassisoqaraangat iliuuseqartoqartassasoq.

Meeqqat tusaaneqarlutik aammalu tamat oqartussaaqataasut akornanniillutik misigisassavaat. Meeqqat aalajangeeqataanissaminnut pisinnaatitaaffeqarput, ukiui perorsimassusaallu eqqummaariffigiinnarlugit. Meeqqat oqaasii oqariartuutaallu aallaavigalugit iliuuseqartoqarnissaa pisinnaatitaaffigaat. Uagut inersimasunut pisussaaffigaarput.

Meeqqat peqqissut peqqissusaat ataatsimut makkunatigut isigineqassaaq – inooriaatsikkut, peqqinnikkut aammalu atuarnerat ilinniarnerat eqqarsaatigalugu, suna tamaat meeqqat peqqissumik toqqissisimasumillu meeraanerannut attuumassusillit uuttuutigalugit. Isumaqarpugut meeqqat peqqissut peqqinnartumik toqqaasartut aammalu meeqqanut allanut inersimasunullu peqqinnartumik attaveqartarlutik.

Meeraq kinaluunniit qanilaartumik soqutiginnippaluttumillu naapinneqartassaaq. Uatsinnut pingaartuuvoq meeqqap inersimasullu akornanni tatiginninnermik pilersitsinissaq aammalu oqaloqatigiinnissamut piffissalerluta, taamatullu meeqqap oqariartuutaa paasilluarlugu. Qanga meeqqamut pisimasut akuersaartsigit.

MIO meeqqamik naapitsinermi maligassatut inissisimassaaq aammalu inersimasut tamaasa kaammattorumavai namminneq iliuutsitik oqaasiininngaanniit ersarinnerusarmata eqqummaariffigissagaat.

MIO isumaqarpoq meeqqat suliaminnik nalunnginnilluartut naapittassagaat aammalu naliliinissatsinnut pikkorinnerusariaqartugut , taamatullu misilittakkagut ilinniarfigissagigut, immikkut sulialittut aammalu angajoqqaatut. Ilisimasagut misilittakkagullu avitseqatigiiffigisassavagut.

Inersimasut meeqqat ukiui aammalu perorsimassusaat eqqarsaatigalugit sapinngittussaavaat piumaffiginninnissartik aammalu unammilliisarnissartik, taamaalilluni meeraq peroriartorniassammat aammalu piginnaasani annertusarsinnaaniassammagit. Ilimagisaqarneq aammalu allanngorneq oqimaaqatigiittariaqarput.

MIO-p upperaa meeqqap inuunera ataatsimut isigisariaqartoq aammalu ajunngitsunik piareersarluarsimasunillu ingerlariaqqittoqartassammat.