Chat-ikkut saaffiginnittarfik - MIO.GL
Chat-ikkut saaffiginnittarfik

mio-chat-logo-194x300

Aalajangernikuuvugut chat-i taamaatinniarlugu,
kisianni mailikkut mio@mio.gl-ikkut,
oqarasuaatikkut 346940-kkut taavalu 1899-imut SMS-erlutit attavigisinnaavatsigut.

 

Ataani meeqqat inuusuttullu allannikuusaat ilai akissutigullu atuarsinnaavatit. (Atit ilai allanngorneqarnikuupput)


 

:) Hej

Uanga hashimik atuisuuvunga, massakkit suli atigarisarlugu.

Oqaleqateqarusuttarpunga eqqarsarpallaartarama assut.. Kisiat massakkit ikiaroornartoq aterluartutut isigisarpara, pissutigalugu pisimatillunga eqqarsaatikka annikinnerulertaramik, nuannisarnerlu misigilertarlugu.. Massakkut immaqa tarnikkut sanngiippunga… naluara mikisuullungali oqaaseqarpiartuungilanga immaqa aamma taanna peqqutaasimassooq… Eqqarsartarpunga assersuutigalugu: Una oqaleqatigerusuppara ukua tungaatigut. kisiat eqqarsartarlinga uannut tulluanngitsoq taammatut oqaloqatiginiarukku  :/

Kisialli massakkut soorlu nassaarlunga…

Haluu Arnaq,

Qujanaq pikkorillutit qanoq ajornartorsiuteqarnerlutit maanga allakkavit. Hashimik ajornartorsiuteqarnerit illit nalunngilat taannalu qaangerniarlugu iliuuseqarputit maanga allakkavit. Allapputit ikiaroornartup eqqarsaatitit annikinnerulertittarai nuannisarnerlu misigilertarit. Qaratsap ineriartorneranut hashi aamma sunniisarpoq soorlu inuit akornanni qanoq inooqataanissaq ilaannikut sunnertittartoq. Allapputit arlaat oqaloqatigerusuttaraluarit ajornartorsiutit pillugu. Inersimasut arlaat tatigisat soorlu angajoqqaaq/ilaqutaq/ilinniartitsisorluunniit misilillugu oqaloqatigisinnaavat. Taassuma saniatigut 1899-mut allassiinnaavutit ammasarpoq ataasinngornermiit tallimanngorneq ilanngullugu nal. 16.00-18.00. Meeqqanut inuusuttuaqqanullu sianertarfik akeqanngitsoq tlf 134 aamma sianerfigisinnaavat. Ammasarfii: Ullut tamaasa nal.19.00-21.00. Sianeruit kinaanersutit ilisimatittariaqanngilat. Iliuuseqarnerpit takutippaa tarnikkut sanngiitsuunngitsutit arlaatigulli ikiortinnissat/siunnersortinnissat pisariaqartikkit.

Inussiarnersumik inuulluarit

MIO


 

Hej MIO,

Nukappiaraavunga 11½-inik ukiulik, suliffittaarnissaminik soqutiginnittoq. Paasisinnaanngilara, sooq meeqqat suleqqusaanngitsut. Isumaqarpunga sulineq meeqqanut peqqinnartuusoq, qulinik ukioqaraanni sorpassuit saperneqarneq ajortut nutaanillu misiliineq nuannertuusoq.

Angajoqqaarpassuit meeqqatik paarivallaarpaat asattuuppallaartarlugillu nammineertinnginnerisigut imaluunniit ilinniartinnerisigut namminerlu misiliitinnginnerisigut.

Nammineerlunga ullaakkut makittussaavunga, taquassannik piareersaallunga, atisanik errorseqataallunga eqqiaaqataallungalu. Meeqqat meeqqaapput, kisianni inuusaanngillat igalaaminermik sanaat paarisassagut illersugassagullu. Meeqqanik aamma paarsineruvoq, meeqqanik ulluinnarni suliassanik ilinniartitsineq inersimasunngornissamullu ilinniartitsineq.

Inussiarnernerpaamik inuulluaqqusillunga

Inuk, 11½ år

Asasara Inuk,

Qujanaq MIO-mut allakkavit.

Meeqqat sulisarnerat eqqartorneqaraangat, tamatumani pineqarnerusarput meeqqat nunani allaniittut, atuaratik sulisariaqartut. Inersimasunngoriartuaarneq ilutigalugu akisussaaffimmik tigusisinnaanermik annertusiartuaartumik tigusisinnaajartuaarneq ilinniassallugu pitsaasuuvoq inuppassuillu meeqqat pisinnaatitaaffii paatsoortarpaat, imatut paasillugit, meeqqat sulissanngiivissortut, kisianni Naalagaaffiit Peqatigiit Meeqqat pillugit Isumaqatigiissutaat paarlattorluinnaanik isumaqarpoq, pisinnaatitaaffeqaraanni, taava aamma allanut pisussaaffeqarpoq.

Meeqqat killilerneqartarnertik iluaqutigisarpaat kiisalu ukiuminnut inerissimassutsiminnullu naleqquttunik akisussaaffilersorneqartarnissaq. MIO-p ilaatigut angajoqqaat tusarfigisarpaat, meeqqatik pisinnaatitaaffeqaramik erruiumaneq ajortut, kisianni taamaassimappat, taava meeqqat pisinnaatitaaffii paatsoorneqarsimassapput. Meeqqat pisinnaatitaaffiini pineqartut tassaapput, meeqqat nerisassaqarnissaminnut, siniffeqarnissaminnut, inersimasunit asaneqarnissaminnut, atuarnissaminnut ineriartornissaminnullu pisinnaatitaaffeqarnerat. Oqartoqarsinnaavoq, meeqqat ilaat meeqqanut allanut naleqqiullutik angajoqqaamik paarinngimmatsik, nerisinneq ajorlutik imaluunniit asanninnermik tunineq ajormatsik assigiinngitsunik peqquteqarlutik, ikiorneqarnissaminnik pisariaqartitsipput.

Naalagaaffiit Peqatigiit Meeqqanut Isumaqatigiissutaanni meeqqat sulisarnerat pillugu ima allaqqavoq:

Naalakkersuisut meeqqat sulinermut peqqissusaannut, atuartinneqarnerannut ineriartornerannullu akornusersuutaasumik sulinermut illresussallugit pisussaaffeqarput, iisalu meeqqat sulisinnaasut ukiukinnerpaaffiat aalajangersassallugu sulinermilu atugassarititaasunik qulakkeerinnissallutik (Naalagaaffiit Peqatigiit Meeqqanut Isumaqatigiissutaanni artikel 32).

Inatsimmi allaqqavoq, aatsaat 15-iliisimagaanni sulisoqarfinnaasoq. Taamaattorli 13-inik ukioqaraanni oqitsunik suliaqartoqarsinnaavoq imaluunniit 14-inik ukioqaraanni atuarnermut atatillugu sulisoqarsinnaavoq. Inatsisit piupput, meeqqat qasuersaarnissaat sulinatillu atuarnissata qulakkeerniarlugu.

Meeqqat Illersuisuattut isumaqarpunga, pisussaaffeqarneq aammalu alliartorneq ilutigalugu akisussaaffimmik tigusisinnaanermik ilinniartinneqarneq pingaaruteqartuusut. Meeqqat qassinik ukioqaleraangamik sulisassanersut eqqartorneqartuaannarsinnaavoq, kisianni maannakkut inatsit piusoq meeqqat ilinniagaqarnissaat, qasuersaarnissaminnut pisinnaatitaaffeqarnerat kiisalu pinnguarnerup, timersornerup pinngorartitsinerullu tungaatigut suliat sammineqarnerannut tunngatillugu pitsaasuusoq isumaqarpunga.

Piumaguit, isummat saqqummiussinnaavat assersuutigalugulu aalajangiisartunut atuartartutut allagaqarsinnaallutit tamanna pillugu kajumissaarlugillu sulilernissamut ukiut apparteqqullugit. Nammineq inuttut uanga isumaqarpunga kukkunerunngitsoq, ilaquttanik imaluunniit ilisarisimasanik ataatsimut isumaqatigiissuteqareernikkut tiimialunni ikiuunnissaq kaasarfimmiussanillu pissarsilluni, soorlu assersuutigalugu sanilit qimmiat aneerullugu, meeqqanit paarsilluni imaluunniit allanik assigisaannik iliuuseqarluni.

Inussiarnersumik inuulluaqqusillunga

MIO


 

Atuaqatimma aperigaminga angutaatigisinnaanerlunga, kisianni ataata anaanalu oqarput inuusuppallaartunga.

Qanoq iliussaanga??

Asannittumik

11-nik ukiulik

Hej 11-nnik ukiulik

Qujanaq allakkannut. Assut qunusuipputit inersimasunut allanut saaffiginnikkavit, angajoqqaatit isumaqatiginngeriarakkit.

11-nnik ukioqarputit, maannalu inuuninni assut pisoqarpoq, timit allanngoriartorpoq, maannalu niviarsiaqqat/nukappiaqqat soqutigileriartorpatit, angajoqqaatit akiortalerpatit, immaqalu inuit akornanniiffigisavit illit pillugit oqaaserisai aliasuutigisarpatit. Pingaaruteqarluinnarpoq angajoqqaatit tamakku pillugit oqaloqatigisarnissaat, soorlu arnaatit/angutaatit, nuannersumik aamma nuanniitsumik attuualaarineq, atoqatigiinneq, atoqatigiinnermut tunngasut naartunaveersaatit. Angajoqqaatit oqaloqatigisinnaanngikkukkit nalornissutitit pillugit, allanik inersimasunik tatigisinnaasannik nassaarniartariaqarputit. Imaassinnaavoq ilinniartitsisut, skolefe, atuarfimmi inunnik isumaginnittoq imaluunniit ilaqutanni inersimasut allat imaluunniit ikinngutivit ataataa/anaanaa. Aamma MIO-p SMS-ikkut siunnersuisarfianut 1899-mut sms-ernissannut periarfissaqarputit, taannalu ammasarpoq ataasinngorneq-tallimanngorneq nal. 16-18. Akeqanngilaq kinaassutsinnillu taasisariaqanngilatit. Tassani sunaluunniit aamma apeqqutigisinnaavat.

Allamik nuannarisaqarluni aamma allamik nuannarineqarneq nuannertaqaaq. Maannakkutut ukioqarninni angajoqqaatit ilinnut naalagaapput aalajangertussaallugulu susinnaanersutit sussannginnersutillu. Angajulliuneruleruit nammineq aalajangeeqataalersinnaavutit susinnaassanerlutit. Immaqa angajoqqaavit annilaangatigaat arlaata ajortumik peqinammatsit. Taamaattumik pingaaruteqarpoq angajoqqaavit tamanna pillugu oqaloqatiginissaat.

Neriulluta suna tamarmi ingerlalluarumaartoq

Inuulluaqqungaarlutit

MIO