Meeqqat pillugit Siunnersuisoqatigiivinut suleriaasissat

Inatsisartunit Inatsit naappertorlugit nr. 11, 22.November 2011-meersoq, Meeqqat Oqaaseqartartuat Meeqqat Siunnersoqatigiivi peqatigalugit Inatsitit § 15 immikkoortut sisamaat malillugu suleriaasissat Meeqqat Siunnersoqatigiinut aalajangersarpaa.

Anguniakkat suliassallu

Meeqqat siunnersuisoqatigiivini aalajangerneqartarput meeqqat pisinnaatitaaffii pillugit sullissiviup ukiup ingerlanerani suliniuteqarfissai pingaarnertullu ingerlatassaat, tassani sullissiviup inatsisit malillugit suliassai aallaaviusarlutik. Tamanna aalajangersarneqarsimavoq ukiumut naapeqatigiittarnerit pingajussaata ingerlanneqarnerani, naapeqqinnermilu aaqqitassartaat allallu aalajangigassat nangeqqinneqarsimallutik.

Meeqqat Oqaaseqartartuat MIO-p meeqqat pillugit suliassanut pilersaarusiornerani meeqqat siunnersuisoqatigiivisa ikiortarpaat, soorlu meeqqanut attaveqarnissaminut qularnaariniarluni pilersaarusiornerani.

Meeqqat siunnersuisoqatigiivisa Meeqqat Oqaaseqartartuat ikiortarpaat meeqqat pillugit apeqquteqartoqarnerani,siunnersuiniarnerani ikiuiniarneranilu.

Aaqqissuussaanera

Meeqqat siunnersuisoqatigiivini ilaasortat arfineq-marluupput, Naalakkersuisunit toqqarneqarsimasoq Meeqqat Oqaaseqartartuat ilanngullugu. Meeqqat Oqaaseqartartuat tassani siulittaasuuvoq siunnersuisoqatigiinnilu ingerlatsisuulluni.

Meeqqat siunnersuisoqatigiivi assigiinngitsunik suliaqartunik katitigaavoq, ilaasortat tamarmik paasisimasaqarfimminnik avitseqatiginnissallutik. Soorlu maakkuninnga:

  • Meeqqat peroriartornerat ineriartornerallu
  • Meeqqat atuartitaanerat
  • Meeqqat sunngiffimmi piorsarsimassutsikkullu sammisassaat
  • Meeqqat peqqissusaat
  • Meeqqat inatsisitigut pisinnaatitaaffimmikkut inissisimanerat
  • Meeqqat immikkut pisariaqartitallit

Allattoqarfiup aqutsisoqarneq isumagissavaa, Meeqqallu Oqaaseqartartuat meeqqallu siunnersuisoqatigiivi suliaqarnerini ikiortassallugit.

Ataatsimiinnerit

Inatsisini § 15 malillugu meeqqat siunnersuisoqatigiivi ukiumut minnerpaamik sisamariarlutik naapeqatigiittassapput. Saniatigut ilaasortanit minnerpaamik pingasunit Meeqqat Oqaaseqartartuannut piumasarineqarpat, pisariaqartinneqarpalluunniit aamma ataatsimiittoqarsinnaalluni.

Ukiup aallartinnerani meeqqat siunnersuisoqatigiivisa ataatsimiiffissaat aalajangerneqartassapput.

Allaffeqarfik ataatsimiinnissamut aggersaasassaaq. Ataatsimiinnermilu sammineqartussat naapinnerit siuliini isumaqatigiissutigineqareertassallutik.

Pisinnaanngikkaanni allaffeqarfiup pisortaanut nalunaaruteqartoqartassaaq.

Ataatsimiinnermi oqaluuserisassatut siunnersuutit allaffeqarfiup pisortaanut nassiunneqartassapput, kingusinnerpaamik naapinnissamut sapaatip akunneri pingasut sioqqullugit. Meeqqallu Oqaaseqartartuat allattoqarfimmiut suleqatigalugit ullormut oqaluuserisassat aaqqissuuttassavaat. Oqaluuserisassallu naapinnissaq sapaatip akunnerinik marlunnik sioqqullugu nassiunneqartassallugit.

Nalunaarutiginninnerit ataatsimiigiaqqusinerillu tamarmik internetikkut attaveqaatit atorlugit pisassapput. Siunnersuisoqatigiinnut ilaasortat tamarmik pisussaaffigaat allattoqarfik mail-ertik pillugu attavigissallugu.

Aalajangiisinnaassuseqarneq

Inatsisini § 15-imi immikkoortut pingajuat malillugu meeqqat siunnersuisoqatigiivi aalajangiisinnaassuseqartarput Meeqqat Oqaaseqartartuat ilaasortallu allat pingasut peqataagaangata.

Meeqqat siunnersuisoqatigiivini aalajangernerit isumaqatigiinnernit isiginneriaatsinillu tunngaveqartassapput.

Nutaarsiassatigut oqaaseqarnerit

Meeqqat siunnersuisoqatigiivini ilaasortat nutaarsiassanut sulialittut oqaaseqarsinnaapput, siunnersuisoqatigiit Meeqqat Oqaaseqartartuat isumaqatigineqarsimappata.

Nutaarsiassaqartitsivinnut attaveqarnerit Meeqqat Oqaaseqartartuat pisassapput, meeqqat siunnersuisoqatigiivi sinnerlugit meeqqat pillugit oqaaseqartartutut.

Nalunaarusiorneq

Meeqqat siunnersuisoqatigiivi ukiumut ataasiarlutik, allattoqarfik aqqutigalugu saqqummersitassanik suliatik pillugit nalunaarusiortassapput.

Ukiumoortumik naapinneq inassuteqarsinnaatitaasunik

Meeqqat siunnersuisoqatigiivi inatsisini § 16 malillugu, ukiumoortumik inuiaqatigiinni oqartussaasut, pisortat namminersortullu perorsaaviit, peqatigiiffiit allallu inassuteqarsinnaatitaasut soqutigisaqartullu naapeqatigisassavaat.

Najoqqutassiat

Meeqqat siunnersuisoqatigiivini ilaasortat siunnersuisoqatigiit sulineranni peqataallutillu suliniartuussaapput, siunnersuisoqatigiillu anguniagaat inatsit malillugit peqataaffigissallugit.

Meeqqat siunnersuisoqatigiivi allaffeqarfiup siunnersuisoqatigiit sulinissaannik pisussanillu pilersaarusionerani suleqatigiinnittuussapput tapersersuillutillu.

Meeqqat siunnersuisoqatigiivini ilaasortat suliaqarfimminnut tunngassutilinni tapersiisartuussaapput.

Meeqqat siunnersuisoqatigiivini ilaasortat piumasarineqartutut pissuserissaartuussaapput, suliaqarnerminni aammali taassumap avataani.

Meeqqat siunnersuisoqatigiivini ilaasortaq suliaqarnermi eqqartorneqartunut qanippallaaruni attuumassuteqaruniluunniit peqataasinnaatitaanngilaq.

Meeqqat siunnersuisoqatigiivini ilaasortaq tunuassaaq siunnersuisoqatigiit suliaannut akerliusumik allamik suliaqarsimaguni.

Nipangiussisussaatitaaneq

Meeqqat siunnersuisoqatigiivini ilaasortat inatsisini § 19 aammalu pisortani ingerlatsivinni malittarisassat atuuttut malillugit nipangiussisussaatitaapput.

Atuutilersitsineq allannguutillu

Meeqqat siunnersuisoqatigiivisa maajip 28-ani 2014-imi ataatsimiinneranni suleriaasissat atuutilersinneqarput. Allannguinerit pisinnaapput siunnersoqatigiit naapinnerini siulittaasoq ilaasortallu pingasut peqataappata.

Inatsit Meeqqat Oqaaseqartartuat aamma Meeqqat Siunnersoqatigiivi pillugit

Inatsisartut inatsisaat nr. 11, 22. november 2011’meersumit naappertorlugu Meeqqat Oqaaseqartartuat aamma Meeqqat Siunnersoqatigiivi pillugit uani takukkit.

MIO’mi Pilersaarusiukkamik suliniutissat

Meeqqat Oqaaseqartartuat, Meeqqat Siunnersoqatigiit aammalu MIO suleqatigalugit piareersarpaa, MIO’mi anguniagaat pilersaarusiornerillu Meeqqat Pisinnaattitaaffii pillugit ukiuni tulliuttuni 2016-2018’mut.

Pilersaarusiat suliniutissat uani takuuk.

MIO aamma meeqqanik peqataatsitineq

Meeqqat Oqaaseqartartuat aamma Meeqqat pisinnaatitaaffii pillugit sullissivik MIO, meeqqat inuusuttullu inuuniarnermikkut atugarisaat pitsanngortinniarlugit suleqataassooq nukittorsaaqataallunilu, Naalagaaffiit Peqatigiivisa meeqqat pillugit nalunaarusiaata tamakkiisumik atuutsilernissaa suliniaqataaffigissallugu.  Tamanna pissaaq meeqqanik inuusuttunillu peqataatitsinikkut aammalu assigiinngitsutigut innuttaasuni meeqqat inuusuttullu pinerullugit paasissutissanik katersinikkut.

Meeqqat Oqaaseqartartuat inuiaqatigiinnut, ilaatigut angajoqqaanut, sullissisunut aammalu aalajangiisartunut taakkartortassuai atugassarititaasut artornartut aammalu meeraalluarnissaraluamut aporfissaasinnaasut, meeqqat inuusuttullu namminneq oqaasii aallaavigalugit.

Meeqqat Oqaaseqartartuat attaviitsutut annertunerpaamik sulivoq aammalu politikkikkut attaviitsuulluni. Meeqqanut aammalu inuusuttunut tunngasut aaqqittariallit taakkartorsinnaavagut, aningaasartuutissat, sulisoqarniarneq aammalu allat eqqarsaatigisassat salliuteqqaarnagit.

Meeqqanit aammalu inuusuttunit ilisimasat ataani allassimasut tunngavigalugit pilersinneqartarput:

  1. Immikkut oqaloqatigiilluni
  2. Immikkut ilisimasallit, meeqqat ataatsimeeqatigisarlugit pisat assigiinngitsut eqqarsaatigalugit
  3. Immikkut ilisimasallit ataatsimiitillugit, meeqqat najugaanni ataatsimeeqatigitsiartarlugit
  4. Ataatsimiinnerit isummersornerillu Meeqqat Isummersorfianneersut Nakuusa-meersullu peqatigalugit
  5. Qarasaasiaq aqqutigalugu meeqqat akisassaat apeqqutit, sapinngisamik meeqqanik inuusuttunillu sinniisuulluarsinnaasunik aallaavilik

Oqaloqatigiinnerit aammalu ataatsimiinnerit ornigulluni imaluunniit atortorissaarutit aqqutigalugit pisinnaavoq, assersuutigalugu MIO-p nittartagaatigut allaqatigiilluni imaluunniit Skype aqqutigalugu. Meeqqat Oqaaseqartartuat ukiumut Kalaallit Nunaanni piffiit 4-6-it pilersaarusioriikkamik tikeraartassavai imaluunniit allanik piffinni siunertaqarnikkut.

Meeqqat Oqaaseqartartuat meeqqat tamaasa Kalaallit Nunaanniittut sullippai, suiaassusaat, suminngaanneerneri imaluunniit oqaasii suugaluarpataluunniit. Meeqqat inuusuttullu oqaatsit Meeqqat Oqaaseqartartuat oqaloqatiginninnermi atorusunnerusatik atorsinnaavaat.

Sullinniakkat eqqarsaatigalugit meeqqanut tulluuttumik attaveqartarpugut, siunissaq eqqarsaatigalugu attaveqaqatigiinneq mobilit video-isigut/qarasaasiakkut oqaluttualiakkut, assitigut, titartakkatigut, ilusilersukkatigut assigisaannilluunniit isikkoqarsinnaavoq.

Naalagaaffiit peqatigiivisa Meeqqat pillugit Isumaqatigiissutaa uani atuarsinnaavat.

Meeqqat pisinnaatitaaffii ilisimavigit?

Meeqqat nerisassanik, sinimmik isumassorneqarnissamillu pisariaqartitsipput: Meeqqat timikkut, tarnikkut, anersaakkut, inuuniarnikkullu ineriartorniassagunik pitsaasunik atugassaqartinneqarnissartik pisinnaatitaaffigaat.

Meeqqat pisinnaatitaaffii ilisimavigit?

Meeqqat nerisassat, sinik isumassorneqarnerlu pisariaqartippaat: Meeqqat ullumi ulloqeqqanut sutorpa?

Meeqqat pisinnaatitaaffii nalunngiligit?

Meeqqat nerisassat, sinik isumassorneqarnerlu pisariaqartippaat: Meeqqat asanninermik misigitippiuk? Meeqqat Innalermat atuffappiuk, ullaakkut makeqatigaajuk, aneernerani malinnaaffigaajuk?

Meeqqat pisinnaatitaaffii ilisimavigit?

Meeqqat nerisassat, sinik isumassorneqarnerlu pisariaqartippaat: Meeqqat illaqatiginissaa eqqaamaviuk?

Meeqqat pisinnaatitaaffii ilisimavigit?

Meeqqat nerisassat, sinik isumassorneqarnerlu pisariaqartippaat: Eqqaamallugu meeqqat qimalerukku asallugu eqitaarnissaa kunilaarnissaalu.

Meeqqat pisinnaatitaaffii ilisimavigit?

Meeqqat atuarnissaminnut pisinnaatitaaffeqarlutillu piginnaatitaaffeqarput: Eqqaamaviuk, meeqqavit ullumi suna ilinniarsimaneraa pillugu oqaloqatigissallugu?

Meeqqat pisinnaatitaaffii ilisimavigit?

Angajoqqaat meeqqamik inuunerissaarnissaannut akisussaanerpaapput: Illit pisariaqartitatit tunulliuppigit meeqqavit pisariaqartitai salliutillugit?

Meeqqat pisinnaatitaaffii ilisimavigit?

Angajoqqaat meeqqamik inuunerissaarnissaannut akisussaanerpaapput: Meeqqat oqaloqatiginerani ”Qanoq isumarpit?”-mik aperinissaa eqqaamaviuk?

Meeqqat pisinnaatitaaffii ilisimavigit?

Angajoqqaat meeqqamik inuunerissaarnissaannut akisussaanerpaapput: Ullumi meeqqat nersualaassallugu pakkutissallugu eqqaamaviuk?