MIO-p Nersornaasiuttagaa 2020 tunniunneqassaaq
MIO-p Nersornaasiuttagaa 2020 ukioq manna inunnut marlunnut immikkut suliniuteqarluarsimasunut tunniunneqarpoq. Taakku tamarmik immikkut inuiaqatigiinni malunnaateqarluartumik suliniuteqarsimapput, meeqqat pisinnaatitaaffiisa ilisimaneqarnerulernissaannik kiisalu meeqqat inuuniarnikkut atugaasa pitsanngorsarneqarnissaannik suliaqarsimapput.
Akissarsisup aappaa tassaavoq ilinniartitsisunngorniaq Ikamiuniittoq Apannguaq Lynge Tellesen. Nunaqarfimmini immikkut ittumik suliniuteqarsimanini pillugu nersornaaserneqarpoq. Meeqqat ikiorserneqarnissamik pisariaqartitsisut sunngiffini allaat atorlugu ikiortarpai, inuttut naleqassusaasa aamma imminnut tatigissusaasa utertitseqqinnissaannut suleqatigisarlugit. Inuiaqatigiinni uagutsitut ittumi, imminnut ungasittunik illoqarfeqarlunilu nunaqarfeqarfiusumi ikiortissarlu ungasissinnaallunilu utaqqinarsinnaasumi najugaqarfiusumi, paqumigisanik oqaluuserinnilersitsisinnaavoq. (Meeqqat pillugit Isumaqatigiissummi artikel 34).
Apannguaq Lynge Tellesen arnaavoq inuusuttoq nukittooq, nunaqarfimmi oqallitsitsilersinnaasoq kiisalu Naalagaaffiit Peqatigiit Meeqqat pillugit Isumaqatigiissutaat pillugu (Artikel 42) meeqqanik inersimasunillu ilinniartitsisartoq. MIO-p saqqummersitai killiliinermut tunngasut atorlugit meeqqanik inersimasunillu sulitilluni sunngiffimminilu ilinniartitsisarpoq. (Meeqqat pillugit Isumaqatigiissummi artikel 12).
Akissarsisinneqartussap aappaa tassaavoq atuakkiortoq Niviaq Korneliussen. suiaassuseqarnerup, atoqatigiinnerup aamma imminortarnerup paqumigiunnaarlugit oqaluuserineqartalernissaat ukiuni kingullerni marlussunni sulissutigisimavai. Namminiusinnaanerup sammineqarnissaanik aamma sulissuteqarsimavoq. (Meeqqat pillugit Isumaqatigiissummi artikel 2).
Taassuma saniatigut inuusuttut akornanni oqaluuseriumaneqanngitsut annertunerpaat ilaat oqaluuseritillugu aallartissimavaa, tassalu: Imminortarneq. Imminortarnerup paquminartutut isigineqarunnaarnissaa kiisalu inuusuttunut ikiorsiinerup eqqortup pigineqalernissaa sulissutigisimallugit. (Meeqqat pillugit Isumaqatigiissummi artikel 39)
Niviaq Korneliussen arnaavoq sapiitsoq, sammisat taakku oqimakkaluaqisut inuttullu akisusinnaagaluaqisut innuttaasut uisissinnaavai. Sulinermini eriaginerpaasai tassaapput inuusuttut ajornartorsiortut. Eqimattakkuutaani suliaqartillugit suleqatiginikuuai. Inuusuttut misigissutsiminnik oqaaseqarsinnaatitaanertillu taakkunani ilikkartarpaat, minnerunngitsumillu taamaaliornissartik pissusissamisoortoq ilikkartarlugu. Inuiaqatigiinni sunniutilimmik taamaalilluni angusaqarsinnaavoq.
MIO-p Nersornaasiuttagaa diplomitaqarpoq kiisalu checkitaqarpoq, nersortaaserneqartut tamarmik immikkut kr. 10.000-inik pissarsissapput, aningaasallu Nuna-Fondenimit aningaasaliissutaapput.
Uani tusagassiorfinnut nalunaarut PDF-inngorlugu takujuk.
