Arctic Sport Ikerasak inuiaqatigiinni meeqqanut immikkuullarissumik iliuuseqarsimaneranut MIO-mit ukiumut nersornaasiunneqartartumik nersornaatisitinneqarpoq.
Ullumi Arctic Sport Ikerasak MIO-mit nersornaatisitinneqarpoq, nersornaallu inuiaqatigiinni meeqqanut inuusuttunullu suliarisarsimasaannut ajunngilluinnartumut nersorinnissutaavoq. Peqatigiiffimmi kulturi timersornerlu aqqutigalugit meeqqat pinnguarfigisinnaasaannik, ilinniarfigisinnaasaannik ineriartorfigisinnaasaannillu toqqissisimanartumik sinaakkusiisoqarsimavoq, tassanilu kulturikkut kingornussat sinaakkutillu ataqqeqqissaarlugit ingerlatsisoqarluni.
Naak atortussat annikikkaluartut, sungiusarfissallu unammillernartortaqartaraluartut Arctic Sport Ikerasak sumiiffimmi meeqqanut annertuumik allannguipput. Inuit Games aqqutigalugu meeqqat ataatsimoorfinni nalilinni peqataasinnaalerput, tassanilu imminnut tatiginninnerat ataqatigiissusaallu pitsanngorsaaffigineqarpoq. Suliniutigineqartartut ataatsimoornerup ataqatigiissusaannut nuannaalersitsillutillu ineriartortitsipput.
MIO-p ukiumut nersornaasiuttagaa: Meeqqat pisinnaatitaaffiinut nersorinnissut
FN-ip Meeqqanut isumaqatigiissutaata malunnartinniarnera novembarip 20-ani pisarpoq, ullorlu taanna MIO-p ukiumoortumik nersornaasiuttagaa inummut, peqatigiiffimmut eqimattanullu meeqqanut immikkut iliuuseqarsimasunut tunniunneqartarpoq. Neersornaat meeqqat pisinnaatitaaffiinik naammagisimaarinninneranillu immikkuullarissumik suliaqarsimasunut nersorinnissutaavoq. Nersornaatisisoq diplominnattarpoq checkimillu 20.000 kr.-imik nalilimmik tunineqartarluni, tassungalu Nuna-Fonden aningaasaliisuuvoq.
Arctic Sport Ikerasaap sulinerminni FN-ip Meeqqanut isumaqatigiissutaani tunngavigineqartut naammassineqartarput, tassunga ilanngullugit pinnguarnissamut sunngiffimmilu sammisaqarsinnaanerannut pisinnaatitaaffiit, ineriartornissamut pisinnaatitaaffiit, kulturikkut inuiaqatigiinnilu sammisanut peqataanissaminnut pisinnaatitaaffiit naammassineqarput. Arctic Sport Ikerasaap aallussineratigut meeqqat inuusuttulu Ikerasammeersut kulturikkut kingornussanut annertuumik atassuseqarlutik peroriartorsinnaapput, aammalu toqqissisimanartuni tapersersuisunillu sinaakkuteqarlutik ineriartorsinnaallutik.
Arctic Sport Ikerasammut qujanaq
MIO-mit Arctic Sport Ikerasak qujaffigerujussuarparput tunniusimalluarlutik sulisimanerannut aammalu meeqqat inuunerinnissaannut pisinnaatitaaffiinullu allanngueqataanerujussuannut. Najugarisaminni meeqqanut inuusuttunullu pitsaasumik suliniuteqarnerat pitsanngorsaaqataanerallu nuannaarutigeqaarput.
2024-mi MIO-p nersornaasiuttagaannut innersuussisimasunut tamanut aamma qujarujussuarpugut. Tunniussasi aallaavigalugit meeqqat pisinnaatitaaffiinut suleqataasut nersorniarnissaannut malunnartinneqarnissaannullu suleqataavusi, iliuusissinnut qujanarujussuaq.
Paasissutissat sukumiinerusut piniaraanni saaffissaq:
MIO
mio@mio.gl
+299 346940