Meeqqat perlerlutik innartarput. Meeqqat timikkut tarnikkullu annersarneqartarput kinguaassiutitigullu kanngutsaattuliorfigineqartarlutik. Meeqqat angajoqqaatik aalakoormata/ikiaroormata ersipput. Meeqqat angerlarsimaffimmi eqqissiviilliornermi isiginnittuupput. Meeqqat angerlarsimaffiup avataanut inissinneqarput. Meeqqat inuusuttullu 18-it inorlugit ukiullit imminnut toquttarput.
Oqaluttuat tamatta ilisarisinnaavagut. Amerlasuut namminneq misigisimavaat imaluunniit affarlitik taamak misigisaqartut isigisimavaat. Kisitsisit takutippaat ajornartorsiuterpassuaqartoq. MIO-mi ukiorpassuarni meeqqanik hunnorujulikkaanik oqaloqateqartarsimavugut, ajornartorsiutillu nunatsinni aalajangiisartunut uppernarsartarsimallutigit. Nalunngilarput meerarpassuit atugarliortut. Massakkullu iliuuseqartoqartariaqalerpoq.
Taamaattumik nuanneqaaq Meeqqanut, Inuusuttunut Ilaqutariinnullu Naalakkersuisoq nutaaq, Mads Pedersen, qanittumi tusagassiortunik katersortitsigami meerarpassuit inuusuttullu inuuneranni pissutsit akuersaarneqarsinnaanngitsut saqqummiummagit. MIO-mit aallussinera, meeqqat atugarisaannut ernummateqavinnera ajornartorsiutinullu iliuuseqarusunnera nuannaarutigeqaarput.
Mads Pedersenillu meeqqanut ikiuunnissatsinnut tapersersuinissatsinnullu tamatta akisussaassuseqartugut oqaaseqarnera ilumoorpoq. Tamannali naammanngilaq. Akisussaaffik innuttaasunut tunniutiinnarsinnaanngilarput. Sumiiffinni maligassiuisut meeqqanik isumaginnissasut naatsorsuutigiinnarsinnaanngilagut. Ilissiuvusi, nunatta politikkerii, Inatsisartuni kommunalbestyrelsenilu ilaasortat nutaat – minnerunngitsumillu – Naalakkersuisut nutaat – akisussaaffimmik tigusisussat. Iliuuseqartariaqalerpusilu.
Naalakkersuisuusarsimasut kommunalbestyrelseusarsimasullu ukiuni kingullerni nunatsinni meeqqat atugarisaannik pitsanngorsaaniarlutik suliniutigisimasaat nuannersut MIO-mit nersualaarpagut. Suliniutillu taakkua peqqutaallutit arlallit pitsanngoriarsimapput.
Ajoraluartumilli tamakkua naammanngitsut nalunngilarput. Kisitsisit, meeqqat namminneq oqaluttuarisartagaat suliassaqarfimmilu sulisut misilittagaasa tamanna takutippaat.
Ukiaanerani ataatsimiinnermi oqaluuserisassatut siunnersuuteqarnissamut ulloq aggustip 15-iat tunniunissamut killigititaavoq. MIO-mit kaammattuutigaarput Naalakkersuisut
Inatsisartullu nutaat nunatsinni unammilligassat annertuut meerarpassuit atugarisaat iliuuseqarfiginissaannut siunnersuutinik suliaqaleriissasut.
Taamaattumik asasagut politikerit:
Pissakitsut atugareriigaat eqqarsaatigalugit ulluinnarni inuussutissat akitsoriartorneri iliuuseqarfigisariaqarpasi. Angajoqqaat ulluinnarni inuussutissanik pisinissamut akissaqannginni peqqutaalluni meeqqat lk, kaallutik, innartarnerat nerineqaratilluunniit atuariartortarnerat akuerineqarsinnaanngilaq.
Imigassaq peqqutigalugu ajornartorsiutit meeqqanut ilaqutariinnullu ajoqutaaqisoq allaammi inuiaqatigiinnitsinnut kulturitsinnullu ajoqutaaqisoq iliuuseqarfigisariaqarpasi. Innersuussutit piareersimapput. Ilissilu iliuuseqartussanngorpusi.
Aammattaaq imigassamik/ikiaroornartumillu atornerluinerup, sumiginnaanerup, kinguaassiutitigut kannguttaatsuliorfigitissimanerup, annersagaasimanerup, imminut toqussimanerup kingorna ataasiakkaat ataatsimullu atugarisat sakkortuut qaangernissaannut aaqqiissummik nassaartariaqalerpusi. Ajornartorsiutit tunngavii iliuuseqarfigineqanngippata ajornartorsiutit meeqqanut ernuttanullu ingerlateqqinneqaannartassapput.
Perorsaasutut, ilinniartitsisutut, isumaginninnermi siunnersortitut tarnillu pissusaattut nunatsinni sulisinnaanerup soqutiginarnerulernissaa sulissutigisariaqarpasi. Sulisummi taakkuupput meeqqat inuusuttullu toqqissisimanartumik ajunngitsumillu peroriartornissaannut atuartinneqarnissaannullu pisariaqartitagut – taakkuuppullu pisariaqartitsisoqartillugu iliuuseqartussat ikiuuttussallu.
Aap inuiaqatigiinni meeqqat atugarisaat pillugit tamatta akisussaaqataavugut, kisianni ajornartorsiutit innuttaasut sumiiffinnilu maligassiuisut kisimik kivissinnaanngilaat. Aaqqiissutit siunertaqassappata piviusorsiortuussappatalu innuttaasut minnerunngitsumillu meeqqat peqataatinneqarlutillu tusarnaarneqartariaqarput. Ilissiuvorli, politikeritut qinikkat, meeqqat ajunnginnerusumik siunissaqarnissaannut aqqutissiuussisussani akisussaaffimmik annerpaamik tigummiartut.