Kalaallit Nunaanni meeqqat inuusuttullu pillugit ilisimasat annikipput. MIO-mit allattugaatinik misissuinermit paasisat saqqummiunneqartumi tamanna takuneqarsinnaavoq. Meeqqat 15-it ataallugit ukiullit pillugit paasissutissat pingaartumik amigaataapput.
MIO-p Tænketanken Mandag Morgen piumaffigisimavaa Kalaallit Nunaanni meeqqat inuusuttullu pillugit ilisimasat 1998-mit massakkumut katersussagaat. Katersuinermilu paasineqarpoq meeqqat inuusuttullu pillugit misissuinerit nutaanngitsuusut. 2021-illu kingorna misissuinerit ikitsuinnaat nassaassaasut.
”Kalaallit Nunaanni meeqqat inuusuttullu pillugit ilisimasanik nalituunik peqarpoq. Kisianni aamma ilisimasat annertuumik amigarput. Ingammik meeqqat 15-it ataallugit ukiullit ilisimasaqarfigineqarnissaat amigaataavoq. Meeqqat pinnguartarneri, pinngortitamik atuineri digitalimillu inuuneri pillugit ilisimasanik amigaateqarpugut,” meeqqat pillugit oqaaseqartartoq Stina Sværd taama nassuiaavoq.
MIO-llu suliniut “Kalaallit Nunaanni meeqqat nipaat – kinguaariinnik ukkataqarneq” aqqutigalugu tamanna aaqqiiffiginiarpaa. Suliniummi meeqqat inuusuttullu angerlarsimaffimmi, atuarfimmi sunngiffimminni – nittartakkatigullu inuunerat misissuiffigineqarniarpoq. Kalaallit Nunaanni atuarfinni tamani klassit tamaasa misissuiffigineqassapput.
Piffissaq ungasinnerusoq eqqarsaatigalugu apersuinermit allatat ilisimasanut toqqorsivimmut toqqammaviliissapput, MIO-llu meeqqat inuusuttullu pillugit ilisimasat pioreersut nutaallu nittartakkamut mio.gl -imut katersorniarpai.
“MIO-p pingaarnertut suliassaa tassaavoq meeqqat atugarisaat pillugit paasissutissanik katersinissaq, ataqatigiissaarinissaq ineriartortitsinissarlu – taakkualu ilaatigut ilinniartunut, ilisimatuunut, ilisimasalinnut politikerinullu siammarterneqassapput. Taamaattumik ilisimasanut toqqorsivimmik pilersitsiniarpugut, tassunngalu Kalaallit Nunaanni meeqqat inuusuttullu pillugit ilisimasat katersorneqassapput – soqutigisalinnillu pissarsiarineqarsinnaanngussallutik,” Stina Sværd oqarpoq.
“Ilisimasanut toqqorsivik ilisimasanik nutaanik ingerlaavartumik ikkussuiffigineqartassaaq. Taamaattumik ilisimatuut misissuisartullu kaammattorpagut, Kalaallit Nunaanni meeqqat inuusuttullu pillugit nutaanik paasissutissaateqaleraangamik, ilisimatusarnermit paasisaqaraangamik nalunaarusioraangamilluunnit MIO-mut nalunaaruteqartassasut. Taamaalilluta taakkua ilisimasanut toqqorsivimmut ilisinnaasassavagut,” meeqqat pillugit oqaaseqartartoq kaammattuivoq.
“Uani siunertaavoq apersuinermit allakkiat ilisimasanullu toqqorsivik ilisimatuunut ilisimasalinnullu iluaqutaassasoq. Pingaarnertullu meeqqanut inuusuttunullu iluaqutaassaaq, tassami inuunerisaat atugarisaasalu ilisimaneqarnerulerneratigut MIO Kalaallit Nunaanni meeqqat inuunerinnerunissaannut sulilluarsinnaanerulissammat,” Stina Sværd naggasiivoq.
PAASISSUTISSAT
“Kalaallit Nunaanni meeqqat nipaat – kinguaariinnik ukkataqarneq” tassaavoq Kalaallit Nunaannni meeqqat inuunerannik ulluinnaanillu misissuineq massakkumut annerpaasoq. MIO-p Tænketanken Mandag Morgen suleqatigalugu Kalaallit Nunaanni atuarfinni tamani klassini atuartut angerlarsimaffimmi, atuarfimmi, sunngiffimmi digitalimillu inuuneranni paasissutissanik misissuiffigissavaat. Suliniut the LEGO Foundationimit aningaasaliiffigineqarpoq.