Meeqqat atuarfiat pillugu aaqqissuussinissamut siunnersuut meeqqat pisinnaatitaaffiisa sanngiillisinneqarnissaannut aammalu assigiinngisitaarneq annertunerulersinnaaneranut aarlerinaateqarpoq, nutarterineq meeqqanik aaqqissuussaasumik peqataatitsinermut kiisalu Kalaallit Nunaanni ilisimatusarnermik tunngaveqanngippat. Meeqqat atugarisaasa ilinniarnerisalu pitsanngorsarniarneqarneri MIO-mit taperserneqarpoq, anguniakkalli naammannginneri naqissuserniarparput. – Aaqqissuusseqqinnermi meeqqat pisinnaatitaaffiisa atuutsinneqarnissaat qulakkeerneqartariaqarpoq.

 “Aaqqissuussinermi taama pingaaruteqartigisumi meeqqat peqataatinneqarnissaat tunngavigineqartariaqarpoq. Meeqqat piviusumik ataqatigiissakkamillu peqataatinneqarnissaat pingaaruteqarpoq – periusituinnaanngitsoq, kisiannili ingerlatsinermi piviusumik meeqqat nipaat aalajangiinerni pingaartillugit. Aaqqissuussinermi Kalaallit Nunaanni meeqqat pisariaqartitaannik, inuuniarnikkut atugaannik aammalu namminneq misilittagaannik ilisimasaqarnermik tunngaveqanngippat, tamanna meeqqap pitsaanerpaamik atugassaqartinneqarnissaanik tunngavimmik unioqqutitsinerusinnaavoq. Taamaattumik uppernasarsaatini pingaarutilinni tunngaveqartumik aaqqissuussineq inissinneqassaaq, tassunga ilanngullugu Kalaallit Nunaannit ilisimatusarnermit paasisat, tunngavigineqartariaqarput,” taama oqarpoq Meeqqat pillugit Oqaaseqartartoq, Stina Sværd.

MIO-p naliliinera malillugu inatsisissatut siunnersuut taama isikkoqartillugu meeqqap pitsaanerpaamik atugassaqartinneqarnissaa, tusaaneqarnissaanut pisinnaatitaaffia aammalu ilinniartitaanermut pisinnaatitaaffia meeqqanut tamanut naligiimmik periarfissiisoq naammattumik qulakkeerinninngilaq.

Pingaartumik meeqqanut immikkut mianernartumik inissisimasut sakkortunerpaamik sunnerneqarsinnaapput. Atuarfimmi ulluinnarni sinaakkutit oqaatsinullu ilinniartinneqarnissamut piffissat allannguutigalugit atuartitsinerup pitsaassusii qaffatsinneqanngippata ilinniaqqinnissamut periarfissanik qulakkeerinnissinnaanngilaq.

Meeqqat atuarfii pillugit aaqqissuusseqqinneq pisinnaatitaaffinnut attuumassuteqarpoq

Meeqqat atuarfiat meeqqat ulluinnarni avatangiisiini qitiuvoq. Meeqqat atuarfianni sinaakkutit allanngortinneqartillugit, tamanna meeqqap pitsaanerpaamik atugassaqartinneqarnissaa pingaarnerpaatinneqassaaq, aammalu meeqqat piviusumik tusarneqartarnissaat – meeqqanut tunngassuteqartunut aalajangiinermi peqataatinneqarnissaat ingerlanneqartariaqarpoq qulakkeerneqarlunilu.

Taamatuttaaq nutarterinerup qulakkeertariaqarpaa meeraq sumiluunniit najugaqaraluaruni, qanorluunniit oqaaseqaraluaruni, innarluuteqaruni allatigulluunniit pitsorluuteqaruni aammalu isumaginninnikkut qanorluunniit atugaqaraluaruni qaffasissumik ilinniartinneqarnissaminut periarfissaqassammata, aammalu meeqqat tamarmik ilinniaqqinnissaminnut inuunerisassaminnullu ingerlariaqqinnissaminnut periarfissaqassammata.

MIO-p ernummatai pingaarnerit – meeqqanullu sunniutai

1) Meeqqat peqataatitsinnginneq – pisinnaatitaaffiinik unioqqutitsineq

Aaqqissuussineq toqqaannartumik meeqqanut sunniuteqassaaq, meeqqalli aaqqissuussaasumik peqataatinneqanngillat. Tamanna inatsisitigut suliaqarnermi pitsaassutsimik apparsaasarpoq – pisinnaatitaaffiinillu unioqqutitsinerulluni.

MIO-p kaammattuutigaa:

• Inatsisitigut aaqqissuusaasumik meeqqat peqataatinneqarnissaanut pisussaaffiliisoqassasoq, taamaaliornikkut meeqqat piviusumik aaqqissuussinerup ilusissaanut, naammassineqarnissaanut kinguneqartinneqarnissaanullu sunneeqataatinneqassapput.

2) Ilisimasatigut tunngaviup ersarissarneqarsimannginnera

Inatsisitigut siunnersuut ersarissarneqarsimanngilaq, suna ilisimatusarneq, suut paasissutissat tunngavigineqarnersut aammalu ilisimasaqarnerup nunatsinni pissutsinut naleqqunnera qanoq uppernarsarneqarsimanersoq. Ilisimatuussutsikkut ilisimasat nunani allaneersut – allanut atuunneranut uppernarsaatitaqanngippat – aarlerinartorsiornerulersitsisinnaavoq, suliniutit piviusumi sunniuteqanngitsut pilersinneqarsinnaallutik, aammalu meeqqat atugarissaannut ilinniagaqarnerannullu ajorseriaataasinnaallutik.

MIO-p kaammattuutigaa:

• Ilisimatusarfimmit ilisimatuussutsikkut paasisat meeqqat atuarfianni iliuusissanik ineriartortitsiniarnermi, naleqqussaaniarnermi nalilersuiniarnermilu pinngitsoorani atorneqartarnissaat,

3) Nuna tamakkerlugu atuutilinnginnerani sioqqutsilluni misileraaneq aallartinneqarnissaa 

Aaqqissuussineq taama annertutigisoq nuna tamakkerlugu atuutilersinneqannginnerani misilerarneqaqqaartariaqarpoq nalilersorneqaqqaartariaqarlunilu. Taamaaliunngikkaanni kukkunerit kingunerluutillu annertuut meeqqanut amerlasuunut ataatsikkut sunniuteqarsinnaapput.

MIO-p kaammattuutigaa:

• Allannguutit annertunerpaat nuna tamakkerlugu atuutilersinneqannginneranni misileraaneq ingerlanneqassasoq, aallartinnermi tunngaviusumik qimerluuinerit ingerlanneqarlutik, aammalu ingerlatsinerup nalaani naammassineranilu namminersortumik nalilersuineq ingerlanneqassasoq. Misileraaneq pilersaarusiorneqartariaqarpoq sumiiffinni assigiinngitsuni najugaqarfiit atugassarititaasa aammalu unammilligassaasa assigiinngissutaat ersersinneqarsinnaasunngorlugit,

4) nukarlerni ulloq atuarfiusoq sivikinnerulissapput atuarfissallu ikinnerulissappata, tamanna naligiinnginnerunermik kinguneqarsinnaavoq

Atuarfik meerarpassuarnut eqqissisimaffiullunilu toqqissisimaffiusarpoq – atuarfik aaqqissuussaasunik sinaakkuteqarpoq, tapersersuiffiusumik ilinniarfissamillu isaaffiuvoq ataatsimoorfiullunilu. Ukiorpassuarni MIO-p angalasarnermini paasinikuuaa atuarfik meeqqat mianernartumik inissisimasut akornanni toqqissisimaffiusoq pingaarutilik – toqqissisimaffik allatigut tikissinnaasimanngisassaraluat. Ulloq atuarfiusoq sivikinnerulissappat meeqqat pineqartut eqqugaanerpaassapput, tassami meeqqat atugarissaarnikkut ineriartornikkullu avatangiiseq illersugaaffitsik eqqissisimanartoq annaassavaat.

Nunatsinni meeqqat amerlanerusut atuareernerup kingorna ornittagaqanngillat, angajoqqaarpassuillu piffissaq tamakkiisoq sulisarlutik, taamaattumik meerarpassuit atuareernerup kingorna akunnerpassuit nammineertussanngussapput. Nukarlerni atuartoq – akullerni angajullerniluunniit atuartumik qatannguteqaruni nukarlerni atuartoq atuanngiffeqarnerulerniaruni angerlarsimaffimmi angajoqqaaminiillu aaqqissuussaanngitsumik kisimiittarneri sivitsussapput– tamannalu meeqqat mianernarnerinut inissisimaffigeriigaannullu annertusaataassaaq. MIO-mit ernummatigineqarpoq atuarnerit sivikinnerusut ikinnerusullu atorneqalissappata meeqqat akornanni skærmimik atuinerup annertunerulernissaa. Toqqissisimananngitsumik inersimasortaqanngitsumillu skærmimik atuinerulernerup kingunerisinnaavaa meeqqat atugarisaat, sinittarneri, isumaginninnikkut attaveqaataat ataatsimoorfinnullu peqataaneri ajornerusumik sunnerneqarneri.

MIO-p kaammattuutigaa:

• akunnerit atuarfiusussat attanneqassasut, atuartitsinerli pinnguarnikkut ilikkarsarnermut, aalanermut, silamiinnermut eqqumiitsuliornermullu sangutinneqassasut – ilinniartitsisullu piginnaasaqartut aqutsisuussapput,
• piffissaq atuartitsiffiusoq ikilisinneqarani piginnaasanik piginnaanngorsaanissaq pingaartinneqassasoq ilinniartitsisullu tapersersorneqassasut,

5) nukarlerni fagit atuartitsiffiusussat pisariillisarneqassasut

Atuartitsineq ataqatigiinnerulissappat, anguniakkat ersarissarneqassappata aammalu tunngaviusumik piginnaanerit periarfissagissaarnerulerlutillu pitsanngorsarneqassappata taava fagit atuartitsiffiusussat pisariillisarneqarnissaat MIO-mit taperserneqarpoq. Nukarlernili atuartitsinissamut sinaakkutit pisariillisarneqassappata tamanna akullernut ikaarsaarnissamut piumasaqaatit annertunerulertussaassapput, tassanngaannartumik ikaarsaarneq peqqunanngeqaaq. Aaqqissuussinermi piumasaqaatit annertusinerinut, fagit amerlinerinut suleriutsillu pisariunerit atulernerinut meeqqanut ersarissaatigineqanngippat, taava atuartut ukiuni atuarfiusuni siullerni toqqissisimaneq patajaassuserlu pilersissimasaat annaaneqarsinnaavoq.

MIO-p kaammattuutigaa:

• Aaqqissuussinermi ersarissumik piumasaqaateqassasoq atuarfik qanoq toqqissisimanartumik, ataqatigiissumik aammalu klassimit klassimut perorsaanermik tunngaveqartumik ikaarsaartitsisassasoq,

6) Oqaatsinik atuartitsinerit pitsanngorsarneqassapput – ilitsoqqussaralugu oqaatsit aammalu allamiut oqaasii

Ilitsoqqussaralugu oqaatsitsigut pitsanngorsaaniarneq MIO-mit taperserneqarpoq, aaqqissuussinermili ersarissarneqarsimanngilaq oqaatsinik atuartitsineq ataatsimut isigalugu qanoq pitsanngorsarneqassanersoq. Danskit oqaasii tuluillu oqaasii 4.klassimit aallartittalissappata, taakkunanilu ilinniartitsineq annertuumik qaffassarniarneqarpat iliuuseriniarneqartoq naammanngilaq. Kingusinnerusukkut aallartinneq ilinniartitsinerup pitsaassusianut aammalu sakkortunerulertariaqarneranut piumasaqaateqarnerulersitsivoq – oqaatsinik ilinniarnermi sinaakkutit nukittuut pigineqanngippata aaqqissuussineq meeqqanut oqaatsinik piginnaanngorsarnerinik nukittorsaanani – annikillisaasinnaavoq. Taamaattumik MIO-mi ernummatigaarput aaqqissuussinermi atuartitsinerup pitsaassusaanut piumasaqaateqartoqannginnera. Aaqqissuussineq piujuartitsinermik tunngaveqarniaruni meeqqat atuarfianni ajornartorsiutit piusut eqqarsaatigineqartariaqarput aammalu Kalaallit Nunaanni meeqqat atuarfii pillugit ilisimatuussutsikkut misissuinermi ilisimasat aallaavigalugit suliarineqartariaqarluni.

Ilisimatusarfimmi ilisimatuussutsikkut misissuinermi paasisat aallaavigalugit nunatsinni meerarpassuit sumiiffinni assigiinngitsuni oqaatsitigut danskit oqaasiinik piginnaanngorsaaneq unammillernartoqartinneqarpoq atuartitsinerup aaqqissuussaaneranit aallaaveqartimik – ingammik Nuup avataani. Sineriap ilaani ilinniartitsineq amerlasuutigut kalaallisut ingerlanneqartarpoq, ilaatigut ilinniartitsisut oqaatsit pillugit ilinniartitsiniartut danskit oqaasiinik qaffasissumik piginnaasaqarneq ajormata. Ilaatigut tamatuma kingunerisinnaasarpaa atuartut danskisut piginnaasassat naapertuuttut pissarsiarineq ajormassuk, taakkualu meeqqat atuarfianniit ingerlaqqiffiusunut ikaarsaarniarnermi ajornartorsiortitsisarput. Aaqqissuussinermi ilinniartitsisut piginnaasaat, ilinniartitseriaaseq aammalu sinaakkusersuineq illoqarfinni nunaqarfinnilu assigiinngissutsit isiginiarnagit suliaqaraanni naligiinnginneq pioreersoq annertuseriaannarsinnaavoq.

Aaqqissuussinermi isiginiarneqartariaqartut ilagaat ilinniarnertuunngorniarfinnut, inuussutissarsiutinut ilinniarfissanut, inuussutissarsiornermik ilinniarnermut ilinniariaqqiffissanullu allanut iserniaraanni piumasaqaataasarmat pitsaasumik danskit oqaasiinik atuisinnaaneq amerlasuutigullu aamma tuluttut oqaatsinik atuisinnaaneq. Eqqarsaatigineqartariaqarpoq sumiiffinni amerlasuuni danskisut amerlasuutigullu tuluttut ilinniartitsineq ingerlanneqartarnera. Pissutsit taamaatsillugit atugassarititaasut Meeqqanut pillugit isumaqatigiissummi allassimasut malillugit immikkoortitsinnginnissamut, assigiimmik ilinniarfissanut periarfissaqarnissamut aammalu meeqqat qaffasissumik oqaatsinik piginnaasaqalernissaannut pisussaaffeqarnerup naammassineqarnissaanut qulakkeerinnittoqartariaqarpoq. Aaqqissuussinermi taakkua inissaqartinneqartariaqarput anguniarneqartariaqarlutillu, taamaaliunngikkaanni meeqqat ilinniarnertuunngorniarfinnut, inuussutissarsiornermik ilinniarfinnut ilinniaqqiffissanullu allanut iserniarnerinut periarfissaat ajortisarneqarsinnaapput.

MIO-mit ilisimavarput aaqqissuussinermut suliaq aallaavigalugu meeqqat kalaallisut ilitsoqqussarinagu oqaasillit periarfissaqalersut ilitsoqqussaralugu oqaatsitik atorlugit atuartitsisoqarsinnaanera. Tamanna ajunngitsuuvoq, kisiannili aaqqissuussinermi isiginiarneqanngilaq qanoq meeqqat allamiut oqaasii atorlugit ilitsoqqussaralugit oqaatsimut ilinniartitsinneqarnissaat qulakkeerniarneqarnersoq killormullu. Uani aamma meeqqat kalaallisut ilitsoqqussaralugu oqaasillit pineqarput. Atuartitsinermi meeqqat ataasiakkaat oqaatsitigut piginnaasaannut naleqqussaasoqartarnissaa pingaaruteqarpoq, taamaaliornikkut meeqqat oqaatsitigut piginnaasaqarluarnissaat inerisarneqarsinnaavoq.

MIO-p kaammattuutigaa:

• atuarfiup meeqqat tamarmik assigiimmik pitsaassusilimmik ilinniartitsinissamut periarfissaqarnissaat qulakkiissagaa,

• Ilinniartitsisut oqaatsinik atuartitsinerup iluani piginnaasatigut ineriartortitsinermik piginnaanngorsarneqarnissaat ukkatarineqassasoq,
• Meeqqat tamarmik ilitsoqqussaralugu oqaasiinik, qanorluunniit oqaaseqaraluarpata, atuartinneqartarnissaat qulakkeerneqassasoq – aammalu meeqqat tamarmik ilitsoqqussaralugu oqaatsitik saniatigut kalaallisut oqaatsinik, danskisut oqaatsinik tuluttullu oqaatsinik ilinniartinneqarnissamik neqeroorfigineqassasut,

7) Atuarfinni inuussutissarsiutit tunngavigalugit pilersinniarneqartut tapersersorneqarnissamut aamma illersorneqarnissamut ersarissunik piumasaqaateqartariaqarput

Atuartut ilaannut inuussutissarsiutit tunngavigalugit naleqquttumik neqeroorutaasinnaapput, aaqqissuussinermili atuartut inussutissarsiutit tunngavigalugit ingerlatsisut ilinniaqqissinnaanerinut periarfissaasa killilersorneqannginnissaat qanoq qulakkeerneqassanersoq ersarissarneqarsimanngilaq. Atuartut inuussutissarsiutit tunngavigalugit ingerlataqartut  amerlanerpaat kalaallisut aamma matematikkimik ilinniartitsinermit annertunerujussuarnik piumasaqaateqartarput, tamannalu eqqarsaatigalugu — ilinniarfissanut ingerlaqqinnissamut tunngatillugu atuartitsissutit tamarmik tunniunneqanngippata — atuartut periarfissaannit annikinnerusunik atugaqalertitsisinnaavoq, soorlu inuusuttut ingerlaqqiffissaatigut, inuussutissarsiutigalugu ilinniarfissatigut imaluunniit qaffasinnerusumik ilinniarfissatigut periarfissaat killilerneqaratarsinnaallutik.

Fagini allani ilisimasat siammasinnginneri peqqutaallutik atuartullu toqqaanissamik periarfissinneqanngikkunik ilinniaqqinnissamut ammaassisussat matuneqaratarsinnaapput. Suliffinnut misiliinerup aaqqissuussaanera eqqarsaatigalugu aamma qulakkeerneqartariaqarpoq atuartut toqqissisimanissaat, ilikkagaqarnissaat aammalu nakkutigineqarnissaat, taamaalilluni ingerlatsineq pissarsiaqarfiussaaq meeqqamullu pitsaanerpaamik ingerlanneqarsinnaalluni. Suliffinnik misiliinermi sinaakkutit, akisussaaffik pitsaassuserlu eqqarsaatigalugit piumasaqaateqarfiuvoq, perorsaanikkut isumannaallisaanikkullu ersarissumik pitsaassusiliisoqanngippat suliffinnik misiliinermi ilinniagaqalernissamut siunertarineqartartoq annaaneqarsinnaavoq, ajornerpaamillu pisoqartillugu meeqqat atugarisaannut, ilinniarnerannut pisinnaatitaaffiinullu pitsaanngitsumik kinguneqarsinnaapput.

MIO-p kaammattuutigaa:

• Meeqqat inuussutissarsiutit tunngavigalugit ingerlatsisut fagini ingerlariaqqinnissamut periarfissiisunut atuartinneqaannartassasut,
• fagimut tunngatillugu tapersersuinissamut aaqqissuussinerit pilersinneqarnissaat, ilaatigut immikkut atuartitsineq aammalu siunnersuineq,
• Atuartut fagitigut kinguaattooruteqaratik klassimut nalinginnaasumut utersinnaanissaat periarfissaassasoq,
• Inuussutissarsiutit tunngavigalugit suliffeqarfiit ingerlatsisut sakkortusisamik nakkutiginninnikkut qulakkeerneqassasoq, suliffeqarfiit atuartunik tigooraasut qaqugukkulluunniit isumannaallisaanermut illersuinissamullu piumasaqaatinik naammassinninnissaat – tassunga ilanngullugu meeqqanut pinerlissimannginnermut uppernarsaatit atuuttut pigineqassasut,
• Suliffimmik misiliinermi ingerlatsineq ilinniarfiussasoq aammalu qaqugukkulluunniit atornerluisoqarnissaa pinaveersaartinneqassasoq, ass. akikitsumik sulisoqarneq eqqarsaatigalugu qulakkeerneqassaaq,
• Suliffeqarfiit paasissutissiiffiginissaannut aammalu perorsaaneq eqqarsaatigalugu piareersarneqassasut, taamaalillutik meeqqanik inuusuttunillu tapersersuisinnaaqqullugit,

 

8) Meeqqat annertunerusumik tapersersorneqartariaqartut – meeqqallu atuartut angerlarsimaffianni najugallit –pingaartinneqarnissaat qulakkeerneqassaaq

Aaqqissuusseqqinnerup meeqqat assigiinngitsunik pissuteqarlutik perorsaanermik-tarnikkullu immikkut pisariaqartitsisunut tapersersorneqarnissamik ersarissunik pituttuisunillu aalajangersagaqarfiunngilaq. Inatsisitigut minnerpaaffissamik tunngavilersuisoqanngippat ersarissumillu akisussaaffimmik inissiisoqanngippat meeqqat pineqartut ineriartornissaannut, atugarisaannut ilinniarnissaannullu pisinnatitaaffeqarneri eqqarsaatigalugit perorsaanermi immikkut ilisimasallit ikiuunnerannik pissarsinatik, naleqqussakkamik ilikkarsaratik
pingaarutilimmillu suliassaqarfiit pisussaaffilersorfigisaanni sullinneqaratik ingerlaannartinnissaat navianaataavoq. Tamannalu meeqqat atuarfianni tamanut inissaqartitsisumik suliniuteqarnermut naapertuutinngilaq.

Aaqqissuussinermi ersarissumik meeqqat atuartut angerlarsimaffianniittut ukkatarineqanngillat.

Meeqqat atuartut angerlarsimaffianni najugallit immikkut ittunik atugaqarput – ilaquttatik qimaqqavaat, angerlarsimaffiup atuarfiullu akornanniipput amerlasuutigullu killilimmik inersimasunut attavimmik aalaakkaasunik avatangiiserisaqarfiusarnani. Ulluinnarisaat ataqatigiissaarinissamut, attaveqaqatigiinnissamut tapersersuinermut patajaatsumillu ilikkarsarsinnaanissaannut immikkut piumasaqaatitaqarpoq, inatsisissatullu siunnersuummi taakkua ersinngillat. Inatsisissatut siunnersuummi akisussaaffiit, suleqatigiinnissaq malitseqartitsinissarlu ersarissarneqanngippat, taava eqimattat pineqartut atuutilersitsinermi isiginngitsoorneqarsinnaapput.

MIO-p kaammattuutigaa:

• Aaqqissuussinermi tigussaasumik aalajangersimasunik piumasarineqassaaq meeqqat immikkut tapersersorneqartariaqartut tapersersorneqassasut,
• Meeqqat atuartut angerlarsimaffianniittut: meeqqat atuartut angerlarsimaffianniittut pillugit immikkut aalajangersaasoqartariaqarpoq, tassanilu sinaakkutit akisussaaffiillu ersarissuussapput aammalu tapersersorneqarnissamut, suleqatigiinnissamut malitseqartitsinissamullu aalajangersaasoqassaaq, taamaalilluni meeqqat atuartut angerlarsimaffinniittut ingerlaavartumik, atugarissaarfiusumik aammalu atuartinneqarnermut naligiimmik tapersersuinertalimmullu ingerlatsinissaat qulakkeerneqassalluni.

MIO’p pingaarnertut oqaatiginiagai

Atugarissaarnerup atuartinneqarnerullu annertusarneqarnissaannut anguniakkap MIO-p taperserpaa, meeqqalli atuarfiat pillugu aaqqissuussinermi Kalaallit Nunaanni ilisimatusarnikkut ilisimasat paasisallu aallaaviusariaqarput aammalu meeqqat aaqqissuussaasumik peqataatinneqartariaqarlutik. Meeqqamut pitsaanerpaaq, meeqqat tusaaneqarnissamut pisinnaatitaaffii, naligiimmik pitsaasumik atuartinneqarsinnaaneq pissutsinnut atuuttunut tutsinneqassapput. Aaqqissuussinermi ilitsoqqussaralugu oqaatsit allamiullu oqaasii pitsanngorsarneqassapput, taassumalu saniatigut qulakkeerneqassalluni allannguutit meeqqat inuusuttullu ilinniarnertuunngorniarfinnut, inuussutissarsiutinut ilinniarfissanut ingerlariaqqiffiusunullu ingerlaqqinnissaannut killilersuissanngitsut.

Aaqqissuussinermittaaq ersarissumik pisussaaffiliisumillu meeqqat innarluutillit meeqqallu immikkut pisariaqartitsisut illersorneqassapput aammalu perorsaanermik tapersersuinertalimmik klassimit klassimut ikaarsaarsinnaanissaat periarfissaalissaaq aammalu meeqqat atuartut angerlarsiaffiini najugallit isiginiarneqartariaqarlutik. Minnerunngitsumillu inatsisissatut siunnersuut nuna tamakkerlugu atuutilinnginnerani misiliutitut taallugu misilittarneqaqqaartariaqarput nalilersorneqaqqaartariaqarlutillu. Akunnerit atuarfiusut tunngaviusumik attatiinnaqquneqarput pitsaassuserlu siunertalimmik piginnaasanik piginnaanngorsaanikkut anguneqartariaqarpoq aammalu suliffinnik misiliinerit nakkutigineqarnissaannut ersarissumik malittarisassiortoqartariaqarluni.