Aviâja Egede Lynge maajip 16-iani ukiut qulit meeqqanut oqaaseqartartooreerluni soraarpoq.

Meeqqanut illersuisoq suliaminut uummateqarluartoq atorfimminit unilerpoq. Meeqqanut, Inuusuttunut Ilaqutariinnullu Naalakkersuisoqarfimmi pisortap, Heidi Lindholmip Aviâja Egede Lynge nersualaarpaa:

“Aviâja Kalaallit Nunaata meerartaannut oqaaseqartartuusimavoq pikkorissorujussuaq. Immikkuullarilluinnartumik tunniusimavoq aammalu meeqqat pisinnaatitaaffii, pillugit itinerusumik ilisimasaqarsimavoq, meeqqallu pisinnaatitaaffimminnik ilisimasaqarnissaannut anguniagaqarnini iluatsilluarsimavaa. Aviâjap suleriaasima maqaasissavarput, taamaakkaluartoq neriuppugut Aviâja nunatta innuttaasuinut minnernut atugassarititaasut pitsanngorsarnissaannut suliniuteqaannarumaartoq. Aviâja ajunnginnerpaamik kissaapparput, minnerunngitsumillu MIO-mi ineriartortitsisimaneranut annertoorujussuarmut aammalu nuna tamakkerlugu meeqqat pisinnaatitaaffiisa siammartersimanerinut qujarusuppugut,” Heidi Lindholm taama oqaaseqarpoq.

MIO-mittaaq suleqataasimasut meeqqat illersuisuattut soraalersumut suliarisimasaannullu nersualaarinnipput:

”Aviâja meeqqanut uummateqartorujussuuvoq, meeqqanik oqaloqateqallaqqittorujussuuvoq meeqqallu takuneqarsinnaasutut tusaaneqarsinnaasutullu misigitissinnaallugit,” MIO-mi siunnersortaaneq, Ditte Sølbeck, taama oqarpoq.

Aviâja Egede Lynge ukiut qulit meeqqanut oqaaseqartartutut sulinermini meeqqat pisinnaatitaaffiisa unioqqutinneqarneri ammasumik tamanut saqqummiuttarsimavai, naak ilaatigut unammilligassaqartarsimagaluarluni. Aviâjami meeqqanut oqaaseqartartutut isornartorsiorneqarnissani ernummatigisarsimanngilaa tunniutiinnartarsimananilu. Allattoqarfimmi pisortaq, Rasmine Hansen, taama oqaluttuarpoq.

Taamaattuminguna ullumikkut meeqqat atugarisaat meeqqallu tusarnaarneqarnissaasa pingaassusaat taama isiginiarneqalersimasut. Aviâja Egede Lyngelu ineriartornermut tassunga aqqutissiuusseqataavoq. Aviâjammi meeqqat pisinnaatitaaffiisa pimoorunneqarnissaat sulissutigiuarsimavaa, allaat tusaaneqanngikkaluarluni anguniartarsimallugu.

Assersuutigalu taasinnaavarput Qamani, tassani meeqqat oqaaseqartartuata iliuuseqarneratigut imminut toquttarnerup pinaveersaartinneqarnissaanut periusissiami inuusuttut innersuusiortinneqarput. Tamannalu aallaavigalugu periusissiaq meeqqat innersuussusiornerat aallaavigalugu suliarineqarsimalluni.

Meeqqanut oqaaseqartartussamik nutaamik aggustip aallaqqaataani atorfinittussamik Naalakkersuisut inuttassarsiorput.