MIO aammalu Meeqqat pillugit siunnersuisooqatigiit innuttaasunnik, immikkut ilisimasalinnik, pisortaqarfinnik politikerinillu imigassamik atornerluineq pillugit oqallitsitsiniarput – oqallinnermi meeqqat angerlarsimaffimmi imigassamik atornerluiffiusumi peroriartortut peroriartornerminni kingunerluutaat aamma sammineqassapput.
”Angerlarsimaffimmi imigassamik atornerluffiusumi meeqqat misigisartagaat imaannaanngitsut pillugit MIO oqaloqateqarpoq–aasiit. Meeqqat angerlarsimaffimmi imigassartortoqartillugu misigisartakkatik oqaluttuarigamikkit ilaatigut annilaanganeq, kamaannerit, nakuusernerit, kannguttaatsuliorfigineqarnerit, imminut toqunnissamik sioorasaarinerit allaallumi inuarniarnerit oqaluttaraat,” taama oqarpoq Stina Sværd, Meeqqat pillugit oqaaseqartartoq.
”Ajornartorsiutit taakkuaasiit meeqqanit tusaqqippagut. Inersimasut massakkut iliuuseqartariaqalerput,” Stina Sværd naqissusiivoq, aammalu oqaatigalugu 2018-imi Innuttaasunik misissuisitsisoqarnera aallaavigalugu takuneqarsinnaasoq ilaqutariit meerartallit 39 procentii imigassamik ajornartorsiorfiusinnaasut.
Taamaattumik MIO aammalu Meeqqat pillugit siunnersuisooqatigiit innuttaasunut, immikkut ilisimasalinnut, pisortaqarfinnut politikerinullu oqallinnissamik qaaqqusipput, taassumalu qulequtaraa ”Meeqqat imigassamit salliutillugit”, oqallinneq pissaaq Nuummi Katersortarfimmi apriilip 23-at nal.19-imit 21-mut. Oqallinneq MIO-p Facebookimi qupperneratigut streamerneqassaaq.
Ataatsimiinnermi kikkulluunniit imigassap meerartatsinnut, ilaqutariinnut inuiaqatigiinnullu kingunerluutaannut pinaveersaartitsisinnaasunik oqaaseqarsinnaapput.
”Angerlarsimaffimmi imigassamik atornerluineq toqqaannartumik toqqaannanngitsumillu meeqqanut sumiginnaanermut, nakuusernernut kannguttaatsuliortoqartarneranulli peqqutaasoq ilisimavarput. Imigassamik atornerluineq toqqaannartumik toqqaannanngitsumillu meeqqat angerlarsimaffiup avataanut inissinneqartarnerinut peqqutaasoq ilisimavarput. Aammalu imigassamik atornerluineq imminut toqunnissamut sunniuteqaqataasinnaasoq ilisimavarput. Nunatsinni nakorsaaneqarfiup 2025-mi imminut toquttarneq pillugu ukiumut nalunaarusiaani tamanna aamma atuarneqarsinnaavoq,” Stina Sværd paasissutissiivoq.
”Neriuppugut innuttaasut, immikkut ilisimasallit, pisortaqarfiit, politikerit inuillu attuumassusillit allat aggerlutik oqallinnissamut pingaaruteqaqisumut peqataajumaartut,” meeqqat oqaaseqartartuat naggasiivoq.