MIO: ”Angerlarsimaffiup avataanut inissiisarneq Inatsisartuni isiginiarneqartoq nuanneq, meeqqalli pisariaqartitaat oqaasiilu eqqaamasigit.”
Ukiaanerani ataatsimiinnerup affaani kingullermi ilaatigut angerlarsimaffiup avataanut inissiisarneq oqaluuserineqassaaq. MIO-mit politikerit angerlarsimaffiup avataanut inissiisarnerup oqallisigineqarnera nuannaraarput, taamaakkaluartoq meeqqat pisinnaatitaaffiisa eqqaamaneqarnissaat kissaatigaarput.
Ukiaanerani ataatsimiinneq aallarteqqippat, ilaatigut Inatsiartuni ilaasortat ullormut oqaluuserisassani assigiinngitsuni angerlarsimaffiup avataanut inissiisarneq oqaluuserissavaat.
Oqaluuserisassaq 103-mi apeqqutigineqarpoq suliniutit suut suliniutiginerisigut angajoqqaajunerup akisussaaffiullu pitsaanerulersinneratigut angajoqqaat amerlanerit namminneq meeqqaminnut isumaginnissinnaanerisa qaffassarnissaannut qanoq aqqutissiuussisoqarsinnaanersoq, taamaaliornikkullu angerlarsimaffiup avataanut inissiisarnerit ikilisarneqarsinnaallutik. Oqaluuserisassaq 146-milu meeqqat angerlarsimaffiup avataanut inissinneqarnerini sapinngisamik illoqarfigisaminni/nunaqarfigisaminni inissinneqarsinnaanissaannut inatsisitigut piumasaqaateqalertoqassanersoq oqaluuserineqassaaq.
MIO-mit nuannaraarput politikkitigut angerlarsimaffiup avataanut inissiisarneq isiginiarneqartoq. FN-ip meeqqat pisinnaatitaaffii pillugit isumaqatigiissutaanni allassimavoq nunat ilaasortaasut angajoqqaat angajoqqaajuneq pillugu pisariaqartitsitillugit ikiorneqassasut, aammalu meeraq angerlarsimaffiup avataanut inissinneqartillugu, naalagaaffik meeqqat illersorneqarnissaannut qulakkeerinninnissaminut annertunerusumik akisussaaffeqartoq.
MIO-mit politikerit eqqaamaqquagut meeqqamut pitsaanerpaaq aallaavigalugu iliuuseqartoqartuaannassasoq.
Aalajangiisoqalertillugu meeqqat tusaaniarneqartassapput, taakkuuppummi angerlarsimaffimmi angerlarsimaffiulluunniit avataaniikkaluarunik inuuneri sunnerneqartussat. Aalajangiiniarnermi meeqqat nipaat qitiutinneqartuaannartariaqarput.
MIO-mit Inatsisartuni kinguneqarluartumik oqallittoqarnissaa qilanaaraarput, neriuppugullu politikerit aalajangiinialerunik meeqqanut pitsaanerpaaq anguniarlugu aalajangiiumaarput. Siunissaammi pillugit aalajangiiniarnermi meeqqat qitiutinneqartuaannartussaapput.
MIO – Meeqqat Pisinnaatitaaffiinut Sullissivik
Qullilerfik 2 – 801-2
3900 Nuuk
mio@mio.gl
+299 346940