MIO: Meeqqat atuarfianni iluarsaaqqinnissami meeqqat isumaat qitiutinneqassapput
Inatsisartuni novembarip 19-iani suleqatigiissitamik immikkut ilisimasalinnik inuttaqartumik meeqqat atuarfiannik iluarsaaqqinnissamut kaammattuutitalimmik nalunaarusiortussamik pilersitseqqullugit Naalakkersuisut peqquneqarnissaannik Inatsisartut aalajangiiffigisassaattut siunnersuut oqaluuserineqassaaq. Tamanna nuannerpoq, meeqqalli isumaat puigorneqassanngilaq.
MIO-mit siunnersuut taperserneqarpoq. Suliallu ingerlanneqarnerani meeqqat suliaqaqataasutut peqataatinneqarnissaasa pingaaruteqarnera naqissuserniarparput. FN-ip meeqqat pillugit isumaqatigiissutaanni artikel 12-i malillugu, meeqqat isummersorsinnaatitaapput, inuiaqatigiillu tusarnaarnissaminnut pisussaaffeqarput. Taamaattumik siunnersuutinik suliaqarnermi aammalu atuarfimmik iluarsaaqqinnermi meeqqat uniinnarlutik atuartinneqartussatut isigineqaannassanngillat. Meeqqat atuarfinnik toqqaannaq atuisuupput, taakkualu suut taakkununnga iluatsissimanersut iluatsissimannginnersullu eqqarsaatigalugit misilittagaat isiginnittaasiallu pingaaruteqartorujussuuvoq.
MIO-p FN-ip meeqqat pillugit isumaqatigiissutaannik atuutsitsinissamut nalunaarusiaat 2019-imeersumi meeqqat atuarfik pillugu ima oqaaseqarput:
“Uanga isumaga malillugu meeqqat ilikkarnerpaasarput ilinniartitsisoq meeqqat pissusaat aallaavigalugu periuseqaraangat.”
“Atuarfimmi vikareqarpallaartarpugut, atuagassagullu aallaavigalugit ilikkagaqassanata…, ilinniartitsisullu maalavallaarput, atuartuuneq toqqissisimananngilaq.”
“ Atuarfimmi oqaloqatigiinnissamut periarfissat annertunerusariaqaraluarput, ilikkarnerlu ajornartorsiortut angajoqqaavi pikkorissarsinnaasariaqarput, taamaalillutik meeqqatik ilinniagasserileraangata ikiuussinnaalissagaluarput.”
Oqaaserisimasaat qiviaraanni, meeqqat atuarfimminnut attuumassusillit oqaaseqarfigisinnaagaat takuneqarsinnaavoq, aammalu takuneqarsinnaalluni qanoq tigussaasunik siunnersuuteqarsinnaanersut. Taamaattumik meeqqat inuunerinut sunniuteqartussamik siunnersuusiorniarnermi meeqqat isumaat ilanngunneqarnissaat pingaaruteqarpoq.
Siunnersuummi immikkut pisariaqartitsisunut neqeroorutaasartut pitsanngorsarneqarnissaasa pingaassusaa naqissuserneqara nuannersuuvoq, taamaaliornikkummi meeqqat immikkut pisariaqartitsisut pisariaqartitaminnik pissarsinissaat tapersersorneqassaaq. Atuarfiit meeqqanik assigiinngitsunik atuartuuteqarsinnaanissaat pingaaruteqarpoq, aammalu ilinniartitseriaaseq nalimmassarneqassaaq, taamaalilluni meeqqat immikkut pisariaqartitsisut atuartullumi allat ilorrisimaarlutik atuarsinnaassapput ineriartornerlu annertunerpaaq pisinnaassalluni. Tamaattumik meeqqat immikkut pisariaqartitsisut immikkullu pisariaqartitsinngitsut atuarfimmik aaqqissuusseqqinnissamut siunnersuusiornermut peqataatinneqartariaqarput.
Naggasiutigalugu MIO-mit kaammattuutigineqarpoq atuarfinnik aaqqiissuusseqqinnissamut suliniuteqarnermi angusat uppernarsarneqarsimasut uuttortarneqarsinnaasullu aallaavigalugit ingerlatsisoqarnissaa. Tassami siunnersuutit atuartitsinerup pitsaassusaannut aammalu meeqqat ilorrisimaarnerannut pitsanngorsaataasinnaasutut uppernarsarneqarsinnaasariaqarput, inuiaqatigiinnilu unammilligassatsinnut nalimmassarneqartariaqarlutik.
Asannittumik inuulluaqqusillunga
Med Kærlig hilsen
MIO
Tel.: +299 34 69 40
Mail: mio@mio.gl