MIO: ”Meeqqat siulliunneqassapput – Kalaallit Nunaata nunat tamalaat akornanni pisussaaffini naammassissavai”
Qineqqusaarneq ingerlaleruttorpoq, oqallinnerillu namminiilivinnissamut pissaarneqarnerpaallu politikkiannut tunngassuteqarput, nipituuliunngitsortagulli – meerartagut – puigussanngilagut. MIO-mit allaatigisami nutaami attuumassuteqanngitsumut maalaaruteqarsinnaanermik pisariaqartitsineq allaatigineqarpoq, meeqqallu pisinnaatitaaffiinik sullissivimmi sukannersumik innersuussutigaarput meeqqat pisinnaatitaaffiisa naammassineqarnissaannut suliaq aallartisarneqassasoq, Kalaallit Nunaatalu meeqqat pillugit nunat tamalaat akornanni pisussaaffini naammassissagai.
Kalaallit Nunaat FN-ip meeqqat pillugit isumaqatigiissutaanut 1993-imi peqataalerpoq, taamaakkaluartoq isumaqatigiissummik naammassinninnissatsinnut suli suliassaqarpugut. FN-i meeqqat pillugit ataatsimiititaliaani innersuussutigineqarpoq, nunat ilaasortaasut maalaaruteqarfiusinnaasumik meeqqanut tikikkuminartumik naleqqussakkamillu pilersitsisoqassasoq.
Periarfissarli taama ittoq Kalaallit Nunaanni suli nassaassaanngilaq, Kalaallit Nunaannilu meeqqat maalaarfissaqannginneri peqqutaallutik, pisinnaatitaaffitik innarlerneqartillugit ajornakusoortumi inissisimalertarput.
Meeqqat pisinnaatitaaffii pillugit sullissivimmi MIO-mi allaatigisamik policy briefimillu saqqummerseqqammerpugut, tassanilu meeqqanut naleqquttumik maalaaruteqarfiusinnaasumik pisariaqartitsineq allaatigineqarpoq. Massakkumut inatsimmi allassimasut aallaavigalugit MIO ataatsimut isiginnittumik taamaallaat oqaaseqarsinnaatitaavoq, ataasiakkaallu maalaarutaannik suliaqarsinnaanani, Inatsisartullu Ombudsmandiata suliat allaffissornikkut maalaaruteqarfinnut tamanut maalaarutigineqareernikut taamaallaat suliarisinnaavai. Tamanna isumaqarpoq meeqqat amerlasuutigit piffissaatillugu pisariaqartitaminnik ikiorneqarneq ajortut.
Nunavummi Islandimilu misilittakkat takutippaat attuumassuteqanngitsumut maalaaruteqarsinnaaneq meeqqat pisinnaatitaaffiinut aammalu meeqqat ataasiakkaat sullinneqarnerinut allannguerujussuarsinnaasut. Pisuni tamani meeqqat nipaat ersarinnerulertarpoq, maalaaruteqarsinnaanerlu meeqqat ataasiakkaat inuuneranni allannguinissamut periarfissiisarluni.
Maalaaruteqarsinnaanermut periarfissaq piviusunngortinniarlugu MIO-mit innersuussutigineqarpoq inatsisitigut suliassat politikkikkut aallartinneqassasut. Maalaaruteqarsinnaanerup kingorna meeqqat oqaaseqarsinnaaliinnaratik, aamma Kalaallit Nunaanni meeqqat pisinnaatitaaffii pillugit periutsip pitsanngorsarnissaanut aamma iliuuseqartoqassaaq. Nunat allat FN-imut ilaasortaasut meeqqat pisinnaatitaaffiinut sullissiviit maalaarutinik suliaqarsinnaanerannik pisinnaatitaaffiliinerup kingorna misilittagaqarput pitsaasunik, MIO-millu innersuussutigineqarpoq aaqqiissummik assingusumik pilersitsisoqassasoq.
Kalaallit Nunaata nunat tamalaat akornanni pisussaaffimminik naammassinninnissaa piffissanngorpoq, meeqqallu pisinnaatitaaffiisa naammassineqarnissaannut qulakkeerinnittoqartariaqalerluni.
MIO-mittaaq innersuussutigaarput qinersisaartut qineqqusaartunut ima aperissasut: Kalaallit Nunaanni meeqqat tusaaneqarnissaat illersorneqarnissaallu qanoq qulakkeerniarpisigit?