Meeqqat pisinnaatitaaffii pillugit sullissivimmi MIO-mi aningaasanik atornerluilluni peqquserlunnerujussuaqarsimaneranik kiisalu peqquserlulluni allagaasiortoqarsimaneranik pasitsaassaqartoqarpoq.

Ukiuni arlalippassuarni sulisup tatigineqarluartup atorfini atornerlussimagaa, suliffeqarfiup iluani maannamut misissuinerup takutippaa. Piffissami 2021-miit 2026-mut pisortat aningaasaataannik eqqunngitsumik pigiliussisoqartarsimasoq misissuinerup takutippaa. Aningaasat amerlassusaat maannamut missiliunneqarallartut 3,5 millionit kr.-it sinnerpai.

Suliami nassaarineqartut tunngavigalugit suliaq politiinut nalunaarutigineqarpoq, politiillu paasiniaanermik aallartitsisimapput. Pisimasup annertussusaa qulaajarniarlugu, MIO politiinik tamakkiisumik suleqatiginnippoq. Utertitsisussaatitaanermik piumasaqaat inuit akornanni inatsiseqartitsineq malillugu suliassanngortinneqarpoq.

Meeqqat pillugit Oqaaseqartartoq, Stina Sværd, oqarpoq:

“Suleqat tatigisaq aningaasanik annertoorujussuarmik peqquserluuteqartarsimanera paasigatsigu MIO-mi suleqatikkalu assorujussuaq tupaallappugut. Aningaasammi meeqqat pitsaanerpaamik atugaqarnissaannut pisinnaatitaaffiisalu qulakkeernissaannut immikkoortinneqarnikuupput.

Pasitsaassineq tigussaasunngormat eqqartuussissuserisut suleqatigalugit suliaq ingerlaannaq politiinut nalunaarutigaarput, kukkunersiuisunillu suleqateqarluta tamakkiisumik misissuinermik aallartitsilluta. Peqatigisaanik suliap ineriartornera pillugu naalakkersuisoqarfik ingerlaavartumik ilisimateqattaarparput,” taama oqarpoq Stina Sværd nangillunilu:

 ”Suliap qulaajarneqarnissaa qulakkeerniarlugu MIO-mi sapinngisatsinnik iliuuseqassaagut, suliffeqarfiullu iluani siunissami periaaserineqartussat sukatissavagut. Maanna sukumiisumik iluarsaassisoqarnissaa qulakkiissallugu pingaarnerpaatippara, peqatigisaanillu MIO-p sulinikkut ingerlatsinera meeqqallu pillugit anguniakkat allannguutitaqanngitsumik ingerlatiinnarnissai isumagissavara. Oqaatigineqareersutut, pinerluttulerinermut inatsit malillugu suliap politiinit misissorneqarnissaa pillugu tunniunneqarpoq, taamaammallu paasiniaaneq pillugu sukumiinerusumik oqaaseqarsinnaanngilanga.”

___

Pinerluttulerinermut inatsit malillugu paasiniaanermut tunngasunik paasissutissanik annertunerusunik paasiniaanerit Kalaallit Nunaanni Politiinut saaffiginnissutigineqarnissaat innersuussutigineqarpoq.

MIO-mi tusagassiornermut attaveqaat: Attaveqaqatigiinnermi siunnersorti Mette Schmidt, mtsh@mio.gl, oqa. 291896