2023-mit 2024-mut innuttaasut MIO-mut saaffiginnissutigikkajunnerusaat tassaapput kommunip meeqqat angerlarsimaffiup avataanut inissinneqarnissaanut tunngatillugu aalajangiussaannut isumaqataannginneq, imaluunniit meeqqat angerlarsimaffiup avataanut inissinneqarsimasut atugarisaannik ernummateqarneq. Tamanna “2023-mi 2024-milu MIO-mut innuttaasut saaffiginnissutaat”-ni MIO-p saqqummerseqqammigaani atuarneqarsinnaavoq.
2023-mit 2024-mut MIO innuttaasunit 198-riarluni saaffigineqarpoq – taakkua amerlanertigut angajoqqaajupput, angajoqqaarsiaapput allatigulluunniit meeqqamut isumaginnittuullutik. Saaffiginnissutinilu taakkunani amerlasuut meeqqanut angerlarsimaffiup avataanut inissinneqarsimasunut attuumassuteqarput.
Saaffiginnissutit allat pisortaqarfinnit ikiorneqannginnermut, angajoqqaat aaqqiagiinngissutaannut, angajoqqaarsianut, atuarfinnut meeqqerivinnullu, kinguaassiuutitigut kannguttaatsuliornernut aammalu meeqqanut nakuusernernut, angerlarsimaffeqannginnernut meeqqanullu imminut toqunnissamut aarlerinaatilinnut attuumassuteqarput.
2023-mit 2024-mut saaffiginninnerit ikinnerusut
2023-mit 2024-mut saaffiginnissutit ikippallaarneri peqqutaallutik MIO meeqqat atugarisaat pillugit – Kalaallit Nunaanniluunniit ajornartorsiutit atugaaneri pillugit ersarissumik oqaaseqarsinnaanngilaq. Saaffiginnissutilli aallaavigalugit meeqqat inuusuttullu pillugit unammilligassat ernummatillu suunersut, aammalu innuttaasut suut nalaattarneraat paasisaqarfigineqarsinnaavoq.
Ukiunut siuliinut sanilliutissagaanni, MIO-mut 2023-mit 2024-mut saaffiginnissutit 198-iusut malunnaatilimmik ikileriarsimaqaat. 2019-mut sanilliukkaanni, ukioq taanna MIO-mut saaffiginnissutit 481-iupput.
Malunnaatilimmik appariaateqarneranut peqqutaaqataasut ilagaat – FN-ip meeqqanut ataatsimiititaliaata MIO-llu kaammattuuteqaqataaneratigut – Tusaanngap 2019-imi ammarneqarnera, 2023-milu ammasarfiisa sivitsorneri.
Meeqqat, inuusuttut inersimasullu ajornartorsiutillit, ulloq unnuarlu Tusaanngamit ikiorneqarsinnaaneri siunnersorneqarsinnaanerilu MIO-mit ajunngitsumik ineriartornertut isigineqarpoq.
Innuttaasut MIO-mut saaffiginnikkaangamik suli meeqqat pisinnaatitaaffii pillugit siunnersorneqarsinnaapput aammalu maalaaruteqarfiusinnaasut pillugit ilitsersorneqarsinnaallutik. MIO-miillit suliat ataasiakkaat iserfigineqarsinnaanngillat, taamaakkaluartoq Kalaallit Nunaanni meeqqat maalaaruteqarfissaannik pilersitsisoqarnissaa pillugu nunatsinni politikerit kaammattorneqarsimapput.
Nalunaarusiaq “2023-mi 2024-milu MIO-mut innuttaasut saaffiginnissutaat” uani atuaruk.
Meeqqat maalaaruteqarfissaqalernissaat pillugu MIO-p siunnersuusiaa uani paasisaqarfigiuk.