Illoqarfigut, nunaqarfigut illuutigullu siunissami qanoq isikkoqassappat? Tamanna nuna tamakkerlugu illuutinik ilusilersuisarnermut politikkimi inissinniarneqarpoq. Meeqqat pillugit oqaaseqartartup, Stina Sværdip, illuutissanik politikkiliornermut tunngatillugu meeqqat inuusuttullu peqataatinneqarnissaat eqqaasissutigaa.
Pingasunngorneq apriilip 22-at Inatsisartut ataatsimiinnerminni ilaasortat ilaatigut “Nuna tamakkerlugu illuutinik ilusilersuisarnermut, illuliortaatsinut, politikimik ineriartortitsinissamut suliaqaqqullugit Naalakkersuisut peqquneqarnissaannik Inatsisartut aalajangiiffigisassaattut siunnersuut.” aappassaaneerlugu oqaluuserissavaat.
Siunnersuut Inatsisartunit Naalakkersuisunillu siammasissumik ilalerneqarluni siullermeerneqareernikuuvoq. Siunnersuullu aamma MIO-mit aammalu Meeqqat pillugit Oqaaseqartartumit, Stina Sværdimit, tigulluarneqarnikuuvoq.
”Nuna tamakkerlugu illuutinik ilusilersuinermut siunnersuusiornermi eqqarsaatersuutit pitsaasut arlaqarput. Siunnersuummilu innuttaasut peqataatinneqarnissaata qulakkeerniarneqarnera assut nuannaraara. Naalakkersuisuttaaq attuumassusillit qanimut peqatigalugit sulisoqarnissaa aamma pingaartippaa,” Stina Sværd oqarpoq.
Taamaattoq illuutinik ilusilersuinermut tunngatillugu suliaqarnermi meeqqat inuusuttullu peqataatinneqarnissaat kaammattuutigaa:
”Meeqqanut isumaqatigiissummi allassimasut malillugu meeqqat inuunerinut tunngatillugu suliaqartoqartillugu meeqqat tusaaneqarnissaannut tunngasoq eqqaasissutissiissutigilaarniarpara. Innuttaasunit meeqqat tassaapput illoqarfimmi sumiiffinnik atuinerpaasuusut. Taamaattumik kissaataat pisariaqartitaatalu paasinissaat pillugit peqataatinnissaat tusarniaaffiginissaallu pingaaruteqarpoq,” Stina Sværd naqissusiivoq.
”Illoqarfimmi qaammaqqutit meeqqanut toqqissisimatitsisartut ilisimavarput. Illoqarfimmi pinnguartarfiit soqutiginartut, timersortarfiit allallu pinnguarnissamut silamiinnissamullu kajumissuseqalersitsisut meeqqat peqqinnartumik atugarissaarlutillu ineriartornissaannut peqataasarput,” Meeqqat pillugit oqaaseqartartoq nassuiaavoq.
Stina Sværdip nuannaarutigaarattaaq Erik Jensenip siunnersuuteqarnermini illut pitsaasut naligiimmik tamanit pissarsiarineqarsinnaalernissaannut siunnersuuteqarnera, Naalakkersuisullu akissuteqaatimini illoqarfiup ilua sanaartukkallu peqataatitsinissaat aamma taakkartorlugu.
“Taamaattumik illussanik ilusilersuinermut politikkimi innuttaasunut tamanut – pingaartumik ilaqutariinnut mianernartumik inissisimasunut ineqarniarnerit pitsanngorsarneqarnissaat anguniagassaassasoq naatsorsuutigaara. Soorluttaaq illussanik ilusilersuinermut politikkimi meeqqat, inuusuttut inersimasullu innarluutillit illoqarfimmi periarfissaqarnissaat isiginiarneqarnissaa naatsorsuutigigiga,” Stina Sværd naggasiivoq.
Photo by Mads Pihl, Visit Greenland