Tusagassiorfinnut Nalunaarut / Pressemeddelelse
MIO: “Perorsaanikkut tarnip pissusaatigut siunnersuineq (MISI/PPR) pillugu nuna tamakkerlugu najoqqutassat pillugit oqallinniarnermi meeqqat ataasiakkaat pisariaqartitaat qitiutinneqassapput.”
Novembarip 15-iat 2024 Inatsisartuni perorsaanikkut tarnip pissusaatigut siunnersuisarneq (MISI/PPR) pillugu nuna tamakkerlugu najoqqutassanik pilersitsisoqarnissaa oqallisigineqassaaq. Siunnersuummi siunertaavoq meeqqat immikkut pisariaqartitsisut pillugit Kalaallit Nunaanni kommunit akimorlugit suussusersiniaanermut misissuinermullu sullinneqarnerini assigiissaarnerusumik periuseqalernissaq. MIO-mit siunnersuut ilalernerparput, nunalu tamakkerlugu meeqqanut neqerooruteqarnermi assigiissaakkamik piffissarlu eqqorlugu sullissisoqartarnissaanut siunnersuuteqarneq iluarisimaarlutigu.
Ilaqutariit meeqqatik pillugit ikiorneqarnissamik noqqaassuteqartut, assersuutigalugu tarnermut tunngassuteqartunik misissortinnerit, piffissami matumani ilaqutariit meerartallit piffissaq sivisoorujussuaq utaqqisinnaasarput, sullissinerlu paasiuminaassinnaasarluni. Taamaattumik siunnersuuteqartumik meeqqat atugarliortut pilertornerusumik ikiorserneqarnissamut tapersersorneqarnissamullu pisussaaffeqarneragaanerat MIO-mit isumaqatigineqarpoq.
MIO-milli naqissuserniarneqarpoq katsorsartinnermi siunnersorneqarnermilu meeqqat ataasiakkaat pisariaqartitaat aallaaviusassasoq. Nuna tamakkerlugu najoqqutassiornerup kingunerissavaa assigiissaakkamik neqerooruteqalerneq, taamaaliornerli ataasiakkaanut naleqqussakkamik aaqqiissuteqarniarnermut killilersuissanngilaq.
“Periutsit malittarisassallu eqaatsumik suliarineqassapput, taamaaliornikkut meeqqanut ataasiakkaanut naleqqussaasoqarsinnaassaaq, meerarlu qitiutinneqartuassalluni. Meeqqat ataasiakkaat immikkuullarissumik pisariaqartitsineri assigiissaariniarnermit pilliutigineqassanngillat,” MIO oqarpoq.
FN-ip meeqqat pillugit isumaqatigiissutaanni artikel 2-mi allassimavoq, meeqqat najugarisatik tunngavigalugit immikkoortinneqassanngitsut, artikel 24-milu allassimalluni meeqqat peqqinnissaq pillugu pitsaanerpaamik sullinneqarnissaminnut pisinnaatitaaffeqartut. Taamaattumik perorsaanikkut tarnip pissusaatigut siunnersuisarnerup pitaassusaa eqqarsaatigalugu, najugarisat aallaavigalugit pitsaassutsit assigiinngisitaassanngillat.
Naggasiutigalugu meeqqat pisinnaatitaaffiinik sullissivimmit naqissuserniarparput nuna tamakkerlugu perorsaanikkut tarnip pissusaatigut siunnersuisarnerup najoqqutassiariniarneqarnera pitsaasumik ataqatigiissaakkamillu suleriuseqarnissamut aqqutissaasoq, tassanilu meeqqat immikkut pisariaqartitsisut isiginiarneqarlutik. MIO neriuppoq siunnersuut politikkitigut siammasissumik tapersersorneqarumaartoq, MIO-miillu ineriartortitsineq qanimut malinnaaffigineqassaaq qulakkeerniarneqarlunilu meeqqanut pitsaanerpaaq isiginiarlugu atuutilersitsisoqassasoq aammalu meeqqat ataasiakkaat pisariaqartitaat ataqqineqassasut.
Asannittumik inuulluaqqusillunga
Med Kærlig hilsen
MIO – Meeqqat Pisinnaatitaaffiinut Sullissivik
mio@mio.gl
Tlf: 346940