Seksualitiiti
Seksualitiiti sorpassuarnut tunngavoq. Timernut inerikkiartorneranullu tunngavoq, atoqatigiinnermut peeraqarnermullu tunngavoq, kisianni aamma asanninnermut, misigissutsinut kinaassusermullu tunngavoq. Kinaanernut tunngavoq.
Inuit tamarmik assigiinngillat assigiinngitsumillu inerikkiartortarlutik. Nukappiaqqat ilaat ummajaartarput allallu naamik. Niviarsiaqqat ilaat iviangerujussuanittarput allallu naamik. Ilaat mikisarput, ilaat angisarput il.il. Nukappiaqqat ilaat niviarsiaqqatut misigisarput, niviarsiaqqallu ilaat nukappiaqqatut misigisarlutik. Ilaat suiaaqammut asannilersarput allallu suiaaqatiginngisamut asannilersarlutik. Tamatta assigiinngilagut tamattalu taamaannerput pisinnaatitaaffigaarput – aamma illit.
Ilaat isumaqarsinnaapput inuusuttuulluni artornartuusoq. Immaqa allaanerusutut misigivutit immaqaluunniit apeqqutissaqaannarputit atoqatigiinneq, peeraqarneq inerikkiartornerlu pillugit. Nalugukku kina oqaloqatigissanerlugu taava tamatigut SMS-ikkut siunnersuisarfia 1899 imaluunniit Tusaannga 801180 aperisinnaavat. MIO-mut aamma mailikkut mio@mio.gl saaffiginnissinnaavut imaluunniit telefonikkut 34 69 40.
Aamma ajornanngilaq arnaqatiminoortartut, anguteqatiminoortartut, angutinik arnanillu atoqateqartartut kiisalu angutit arnatut atisaqartartut peqatigiiffiat, Suiaaqatinoortut nuna tamakkerlugu peqatigiiffiat, saaffigissallugu, ateqarporlu LGBT Qaamaneq. Facebookimi nassaarineqarsinnaapput.
Meeqqat tamarmik namminneq inuunertik atussallugu pisinnaatitaaffigaat, akornusersorneqaratik inuuneqarnissartik pisinnaatitaaffigaat kiisalu kinaanertik atuinnassallugu pisinnaatitaaffeqarlutik.