SILARSUARA
Meeqqat Illersuisuata sulissutigaa meeqqat inuusuttullu ajunnginnissaat. Meeqqat inuusuttullu pisinnaatitaaffeqarput. Pisinnaatitaaffeqarneq isumaqarpoq inersimasut isumagissagaat pitsaasumik inuuneqarnissaq, ajortunut illersorneqarnissaq pisariaqartileraannilu ikiorneqarnissaq.
Taamaammat Meeqqat Illersuisuata Aviâja Egede Lyngep meerarpassuit inuusuttorpassuillu oqaloqatigisarpai Kalaallit Nunaanni angalagaangami, Nuummiluunniit MIO’p inissisimaffiani. Meeqqat inuusuttullu pitsaasut oqimaatsullu pillugit oqaloqatigisinnaavai.
Meeqqat inuusuttullu amerlasuut apeqqutissaqarput ikiorneqarnissaminnilluunniit pisariaqartitsillutik, uanilu Silarsuara-mi sammisat amerlasuut atuarsinnaavatit meeraanermut inuusuttuunermullu tunngasut,
pisariaqartikkukkulu, ilisimasat ikiorneqarnissarlu, paasisaqarfiginerorusullugit nassaarisinnaavatit.
Amerlanerpaatigut meeqqamut inuusuttumullu inuuneq nuannerpoq ajunngillunilu. Amerlasuut nuannaarput, ikinnguteqarput pitsaasunillu ilaqutaqarlutik. Ilaannikkulli artorsarsinnaasarpugut nikallugasinnaasarlutalu.
Nikallungasinnaavutit ajortunik assigiinngitsunik nikallortitsisunik misigisaqaruit. Immaqa asanninneq pillugu aliasuuteqarputit pimmatigineqarlutilluunniit. Immaqa persuttaaneq imigassamilluunniit atornerluineq angerlarsimaffinni misigivat. Immaqa aamma nikallungavutit angajoqqaatit avissimammata imaluunniit nalunngisat toqusimammat.
Amerlasoorpassuit peqqutaasinnaapput nikallunganermut. Artorsaraanni pingaaruteqarpoq eqqaamassallugu ajunngisseqqissinnaaneq – taamatulluunniit misigisimanngikkaluaraanni. Pingaaruteqarpoq arlaannut oqaluttuarissallugu suna misiginerlugu, qanorlu innersutit.
Imaassinnaavoq aamma ajunngeqqinnaartutit, nuannaartutit, ikinnguterpassuaqartutit immaqalu peeraqartutit. Imaassinnaavoq atuarfimmi angerlarsimaffinnilu ajunngitsutit. Imaassinnaavoq apeqqutit assigiinngitsunut tunngasut taamaallaat uani akissutissarserusukkitit.
Taamaammat uani nittartakkami sammisat assigiinngitsut aamma atuarsinnaavatit, meeraalluni inuusuttuulluniluunniit artornartunut tunngasut, kisiannili aamma pisinnaatitaaffitit pitsaasut, soorlu assersuutigalugu illersorneqarneq pitsaasumillu inuuneqarneq.
Meeqqat tamarmik pitsaasumik inuuneqarnissartik pisinnaatitaaffigaat.