Avinneq
Avinneq
Oqimaatsorujussuusinnaavoq misigissallugu angajoqqaat avippata imaluunniit najugaqatigiikkunnaarpata. Ilaat aliatsattarput, kamattarput imaluunniit isumaqartarput namminneq pisuussutigalugu. Kisianni inersimasut namminneq qinigarivaat, akisussaaffigaallu ajunngiinnarnissat najugaqatigiikkunnaaraluarunilluunniit. Meeqqat inuusuttullu amerlasuut aliasuutigisarpaat angajoqqatik avikkaangata najugaqatigiikkunnaarangataluunniit. Kisimiinngilatit. Meeqqat ilaasa oqiliallaatigisarpaat angajoqqaatik najugaqatigiikkunnaaraangata. Immaqa angerlarsimaffimminni eqqissiallattoqarmat, angajoqqaatik nuannaarneruleraangata, piffissaqarfigineruleraangamitsit imaluunniit nukissaqarfiginerulerlutit. Assigiinngitsorujussoovoq meeqqat inuusuttullu qanoq misigisarnerat.
Meeqqat ilaasa misigisatik allanut oqaloqatigiissutigerusuttarpaat. Immaqa inersimasut allalluunniit meeqqat aamma angajoqqaavi avissimasut. Pingaaruteqarpoq oqaloqatigisavit nalussanngikkaa qanoq innerit. Ikinngutit, ilinniartitsisut assersuutigaluguluunniit ilaquttavit arlaat oqaloqatigisinnaavat.
Sumi najugaqassaanga?
Meeqqat ilaasa assut eqqarsaatersuutigisinnaasarpaat sumi najugaqassanerlutik. Ataataminni anaanaminniluunniit tamaasaluunniit? Kissaatigisaqaruit eqqarsarlutilluunniit sumi najugaqarusunnerlutit taava ajunngilaq oqaatigigukku. Ajunngilluinnarpoq aamma qinersinissaq peqataaffigerusunngikkukku.
Kalaallit Nunaanni nutaamik inatsisitaarnerata kingorna, taaneqartartup “angajoqqaat akisussaaffiinut inatsit”-mik, illit qanoq isumaqarnerit tusarneqartussaavoq. Tassa imaappoq aperineqassasutit inummit eqqartuussivimmi sulisumit, angajoqqaatit isumaqatigiissinnaanngippata. Meeqqat mikivallaaraangata toqqaannartumik aperineqarneq ajorput, mikivallaartaramik aaliangissallugu sumi najugaqarusunnerlutik. Misissorneqartarporli suna ajunnginnerpaanersoq.
Misigiguit angajoqqaatit sumi najugaqassasutit isumaqatigiissinnaangitsut, illillu suna kissaatiginerpaanerlu oqaluttuunnissaat oqimaagigukku, inersimasoq alla ikiortissarsiorfigisinnaavat.
Nalugukku kina oqaloqatigissanerlugu tamatigut SMS-ikkut siunnersuisarfik 1899 imaluunniit Tusaannga 80 11 80 aperisinnaavat. MIO-mut aamma aperisinnaavutit telefonikkut 34 60 40 imaluunniit mailikkut mio@mio.gl
MIO-p quppersagaaraliai anaana ataatalu najugaqatigiikkunnaaraangata siunnersuutitallit uani atuarsinnaavatit:
Anaana ataatalu najugaqatigiikkunnaalerpata
Anaana ataatalu najugaqatigiikkunnaarpata ulluinnarni inuuneqalerneq
Anaana ataatalu najugaqatigiikkunnaalerpata (inersimasunut siunnersuutit pitsaasut)
Aamma ikiorneqarsinnaavutit meeqqanik illersuisumit Najorti-mit. Najorti tassaavoq inersimasoq ikiuisartoq suut kissaatiginerpaaneritit oqaluttuarinissaannut. Uani meeqqanik illersuisoq Najorti pillugu paasisassarsiorsinnaavutit
Meeqqat inuusuttullu isummatik oqaatigisinnaatitaavaat tusarneqarsinnaatitaallutillu. Meeqqat inuusuttut aamma angajoqqaatit tamaasa takusinnaatitaallugillu nalunngissinnaatitaavaat. Meeqqat inuusuttullu kommunimut ikiortissarsiorsinnaatitaapput (assersuutigalugu Najorti-mik pisinnaatitaapput).