Imminut innarlertarneq
Imminut innarleraanni isumaqarpoq ulluinnarni nuanniilliuuteqarneq.
Amerlasuut imminnut innarlertarput iluminni anniaammik paasisinnaanngisaminnik passussinnaanngisaminnilluunniit misigisaqaraangamik. Allatut imminnut innarlernermikkut timikkut anniaat malugisarpaat paasisinnaasartik passussinnaasartillu.
Taamaammat pingaaruteqarpoq paasissallugu suut misigissutsit ilukkut misiginerlugit, imminut innarlerneq unitsinniaraanni. Ilukkut misigissutsit tassaasinnaapput, anniarneq, imminut allanulluunniit kamanneq paatsiveerunneq kinaanermik sorusunnermillu, nalaannikuusanut qisuariarneq immaqaluunniit ikioqqulluni kissaatigisaqarneq.
Ilaat imminnut innarlertarput kilertiterlutik, imminnut kiillutik imaluunniit cigarittinik uutarlutik. Ilaasa immaqa iigaq assamminnik tilluartarpaat, allat ikiaroornartutortarput allallu imminnut perlilertittarput. Tamarmik inummut ajoqutaasinnaasut, pisarpulli inuk ulluinnarni nuanniiliuteqaraangat.
Amerlanerit imminnut innarlertarnertik allanut isertortarpaat. Inuup taamaasiortup isertuuttarpaa ikiortissarsiussananilu ajornakusoorsinnaammat allanut nassuiarnissaa, sooq taama isiortarnerluni. Imaassinnaavoq aamma inuk taanna kanngusuttoq, ittuukuluutigigaa imaluunniit nalugaa qanoq imminut innarlertarnini unitsissanerlugu.
Imminut innarlertarneq imminut toqunniarsarinerunngilaq, kisiannili nammineerluni ikiorsertariaqarnermut aaqqiiniarnerulluni. Taamaammat pingaaruteqarpoq imminut innarlertarnermut ikiorneqarnissaq, ulluinnarnilu annernartunut ikiorneqarnissaq. Inunnit paasiuminaassinnaavoq paasissallugu qanoq ikiorneqarnissaq atorfissaqartinneqarnersoq, taamaammat pingaaruteqarpoq asoorussinnginnissaq ikiortissarsiornermut.
Nalugukku kina oqaloqatigissanerlugu tamatigut SMS-ikkut siunnersuisarfia 1899 imaluunniit Tusaannga 801180 aperisinnaavat. MIO-mut aamma mailikkut mio@mio.gl saaffiginnissinnaavut imaluunniit telefonikkut 34 69 40.
Meeqqat inuusuttullu tusarneqarnissartik pisinnaatitaaffigaat, pisinnaatitaaffigalugillu oqaatiginninnissaq suna misiginerlugu eqqarsaatiginerlugulu. Meeqqat inuusuttullu ikiorneqarnissaminnut pisinnaatitaaffeqarput.