Innuttaasut tarnikkut ikiortinnissaminnut periar- fissaminnik ilisimasaat
Meeqqat inuusuttullu ilungersunartumik ajornartoornermik misigisaqartut soorlu nalaatat, ajutoornerit, angajoqqaavisa avinnerat imaluunniit angerlarsimaffinni ingerlanerliorfiusuni peroriartortut persuttaanermik atornerluinermillu nalaataqartut, pisinnaatitaaffigivaat tarnikkut ajornartorsiutitik ikiorsiiffigineqarnissaannik.
Taamaattoq meeqqat tarnikkut ikiortinnissaminnik ajornakusoortitseriataartarput, inersimasortatik tarnikkut ajornartorsiutilinnut annertuumik annilaangassuteqarmata paquminartutullu isigisarlugu:
”Naliginnaasumik isigalugu inersimasut akornanni annertuumik kanngugineqarpoq, eqqartussallugu annilaangagineqarluni, tarnikkullu ingerlanerliorneq paasisaqarfigisimanagu. Ajornartorsiut uaniippoq, tassalu meeqqat inuusuttullu tarnikkut ikiortariallit taamaasillutik ikiorneqanngitsooriataarsinnaammata”, Aviâja Egede Lynge oqarpoq.
Tarnikkut ajornartorsiorneq pillugu meeqqanik inuusuttunillu ikiorsiisinnaanerput ammanerusumik pissuseqarluta eqqartussagipput ujartorpaa.
HS-Analyse-miit oqaaseqaat, Meeqqat Illersuisuat Aviâja Egede Lyngep suliareqquneqarsimasoq, takutippaa, apersorneqarsimasut isumaqartut, meeqqat inuusuttullu tarnikkut ikiorserneqartariaqartut periarfissakippallaartut.