Illersorneqarneq
Meeqqat inuusuttullu tamarmik pitsaasumik innuneqarnissaminnut pisinnaatitaaffeqarput. Isumaqarpoq illersorneqarnissaminnut pisinnaatitaaffeqartut pisinnaatitaaffitik unioqqutinneqaraangata.
Illersorneqassaatit ajortunut, assersuutigalugu persuttaanermut kinguaassiutitigullu innarlerneqarnermut, imigassamut ikiaroornartumullu atornerluinermut assigiinngisitsinermullu. Assigiinngisitsinermut illersorneqarneq isumaqarpoq allat assigalugit kinaagaluaruilluunniit pitsaasumik pineqarnissat.
Illersorneqarnissamut pisinnaatitaaffeqarneq isumaqarsinnaavoq qanoq ilioriusissamik pilersaaruteqassasutit angajoqqaavippit avataannut inissinneqarsimaguit. Qanoq ilioriusissap imarivaa ukiuni tulliuttuni ilinnut suna pitsaanerpaassanersoq. Inissiisarneq uani atuaruk.
Illersorneqarnissamut pisinnaatitaaneq isumaqarsinnaavoq aamma pisariaqatilerukku ikiorneqarnissat. Immaqa nutaamik angerlarsimaffik pisariaqartilersinnaavat imaluunniit nakorsamukarnissat atorfissaqartilersinnaavat. Immaqa nerisassaqarnissat imaluunniit oqorsaateqarnissat atorfissaqartilersinnaavat. Imaassinnaavoq aamma qasuersaarnissat meeqqatullu allatut pinnguarnissat atorfissaqartilerit.
Meeqqat inuusuttullu siullermik suliffittaarsinnaapput 13-inik ukioqalerunik. Immikkut malittarisassaqarpoq sumi qanorlu sivisutigisumik sulisinnaanersutit, sualummik suli atuaruit. Malittarisassaqarportaaq suna sulifferni suliarisinnaanerit piffissanilu suni suleqqusaanersutit. Illersoneqarnissamut pisinnaatitaaneq taamaammat aamma isumaqarpoq, inersimasut isumagissagaat sulianut oqimaatsunut illersorneqarnissat, atuarfimmi nutaanik ilikkarnissamut nukeqarniassagavit.
Malittarisassat sulinermut uani atuarsinnaavatit.
Misigisimaguit illersorneqarnak SMS-ikkut siunnersuisarfia 1899 imaluunniit Tusaannga 801180 saaffigisinnaavat. MIO-mut aamma mailikkut mio@mio.gl saaffiginnissinnaavut imaluunniit telefonikkut 34 69 40.
Meeqqat inuusuttullu illersorneqarnissaminnut inuunermullu pitsaasumut pisinnaatitaaffeqarput.