MIO-mut innuttaasut saaffiginnissutaannik nalunaarsuineq 2020
Meeqqat Pisinnaatitaaffiinik Sullissiviup – MIO-p – ulluinnarni suliarisartagaasa ilagaat, meeqqat pisinnaatitaaffii aamma meeqqanut inuusuttunullu tunngatillugu inatsisit pillugit meeqqanut inersimasunullu ataasiakkaanut akeqanngitsumik siunnersuineq. Nalunaarusiaq una tassaavoq Nuummi allaffimmut innuttaasut ullut tamaasa toqqaannartumik saaffiginnissutaannik nalunaarsuineq. Saaffiginnissutit oqarasuaatikkut saaffiginnissutigineqartut, MIO-p Facebook-imi qupperneratigut saaffiginnissutigineqartut imaluunniit meeqqat inersimasullu allaffimmut saaffiginninnerisigut pisartut.
Ukiut ingerlanerini innuttaasut saaffiginnissutigisartagaasa misissornerisa takutippaat, MIO saaffigineqartartoq, innuttaasut misigigaangata, pisortanut saaffiginnikkaluarlutik akissutissarsinatik, imaluunniit taakkunannga pimoorunneqanngitsutut misigigaangata. Nalunaarsuinerup matuma tunngavissaqartumik paasisaasa pingaarnerit ilagaat, pisortani suliat patajaallisarneqarnissaat suli annertuumik pisariaqartinneqartoq. Taamaammat nalunaarsuinermut ilaapput Namminersorlutik Oqartussanut kommuninullu inassuteqaatit ersarissut.