Imigassaq, ikiaroornartoq aningaasanoorajunnerlu
Angajoqqaat imigassartoraangamik, ikiarooraangamilluunniit periaasaat allanngortarpoq. Amerlanertigut paarsilluarsinnaajunnaartarput, iminngikkaangamik paarsilluarsinnaagaluarlutik. Meeqqat inuusuttullu ilaasa misigisarpaat angajoqqaatik puffassimalersartut sakkortuuliulersartulluunniit, allat soqutigineeruttarput allallu misigisarpaat angajoqqaamik soqutigiunnaaraatik.
Ilaatigut aamma angajoqqaat pinnguaannalersarput, nallukattaasinnaapput, bingosinnaavoq allalluunniit pinnguaatit angajoqqaat pisariaqartitsiffimmi paarsisinnaajunnaarutigisartagaat. Immaqa aningaasaatitik tamaasa pinnguarnermut atortarpaat nerisassanuunngitsoq. Tamanna taaneqartarpoq aningaasanoorajunneq.
Angajoqqaat imigassartortuaannaraangata, hashitortuaannaraangatalu imaluunniit pinnguartuaannaraangata, taaneqartarpoq pinngitsuuisinnaajunnaarnermik. Oqimaatsuusinnaavoq pinngitsuuisinnaajunnaaqqasunik angajoqqaaqarluni. Sianigineqarneq toqqissisimanerlu pisariaqartinneqaraluartut peqarneq ajukkajupput.
Misigisimaguit angajoqqaavit iluamik paarinissarnut piffissaqarfiginngikkaatsit imigassaq, hash imaluunniit pinnguarneq peqqutigalugu, taava pitsaanerpaavoq arlaannik oqaloqateqaruit.
Nalugukku kina oqaloqatigissanerlugu tamatigut SMS-ikkut siunnersuisarfia 1899 imaluunniit Tusaannga 801180 aperisinnaavat. MIO-mut aamma mailikkut mio@mio.gl saaffiginnissinnaavut imaluunniit telefonikkut 34 69 40.
Aamma Katsorsaavik atassuteqarfigisinnaavat, pinngitsuuisinnaajunnaarsimasut taamaatinnissannik, meeqqanik inuusuttunillu, angajoqqaavi pinngitsuuisinnaajunnaarsimasunik, ikiuisartoq. Katsorsaasumut sianersinnaavutit 31 44 10 imaluunniit 32 68 11-imut.
Aamma Blå Kors-imiit ikiorserneqarnissaq periarfissaavoq, taakkua aamma inunnik – meeqqanik inersimasunillu – ikiuisarput imigassanik ajornartorsiortunik. Kalaallit Nunaanni Blå Kors pillugu uani atuarsinnaavutit.
Meeqqat inuusuttullu anngajaarniutinut soorlu imigassamut hashimullu illersorneqarnissaminnut pisinnaatitaaffeqarput. Meeqqat inuusuttullu ikiorneqarnissaminnut pisinnaatitaaffeqarput.