Pisinnaatitaaffiit
Naalagaaffiit Peqatigiit Meeqqat pisinnaatitaaffii pillugit Isumaqatigiissut Naalagaaffiit Peqatigiit nunat ilaasortarisaasa tamarmik isumaqataaffigaat novembarip 20-iani 1989-imi Naalagaaffiit Peqatigiit ataatsimeersuarneranni. Ulluinnarnilu isumaqatigiissut Meeqqat pillugit Isumaqatigiissummik taaneqartarpoq. Nunat 194-it atsiorsimapput Naalagaaffiit Peqatigiivisa Meeqqat pillugit Isumaqatigiissutaat malinniarlugu. 11. maj 1993 -imilu Kalaallit Nunaat Meeqqat pillugit Isumaqatigiissummut ilannguppoq, taamalillutillu politikkerit meeqqanut inuusuttunullu neriorsuillutik Meeqqat pillugit Isumaqatigiissut malillugu pisinnaatitaaffiit atuutsinniarlugit.
Meeqqat pillugit Isumaqatigiissut inatsisaanngilaq, nunat atuuttussanngortitsinikuusut Isumaqatigiissut malillugu eqqartuunneqarsinnaanngillat imaluunniit pillaatissinneqarsinnaanatik. Meeqqat pillugit Isumaqatigiissutip malinneqarnissaa sulissutigineqarnissaalu pillugit imminut pisussaalersissimagaanni pingaarnertut maleruagassatut isigineqarsinnaavoq. Naalagaaffiit Peqatigiit Meeqqat pisinnaatitaaffii pillugit Ataatsimiititaliamik pilersitsinikuuvoq, nunallu ukiut tallimakkaarlugit Ataatsimiititaliamut nalunaarusiortassallutik. Ataatsimiititaliap nunat Naalagaaffiit Peqatigiivisa Meeqqat pillugit Isumaqatigiissummik malinnissimanngitsut uparuarsinnaavai assuarisinnaallugillu aammalu nunat sunik sulissuteqassanersut pillugit oqaaseqaateqarsinnaalluni.
Nunani tamani attuumassutilinnik suliaqartut, assersuutigalugu Kalaallit Nunaanni Meeqqat Illersuisuat, NGO suliaqartullu allat pisortatigoortumik Naalaagaaffiit Peqatigiinnut Kalaallit Nunaanni inuit pisinnaatitaaffii pillugit nalunaarusiamut Nunatsinni pissutsit tunngavigalugit unnersuussutinik imalimmut allagaqarnissaminnut periarfissaqarput. Nunat tamarmik nalunaarusiaq tunuliaqutaralugu Ataatsimiititaliami nalilersorfineqartarput. Tassani ineriartornerit nutaat aamma piffissap ingerlasimanerani suliniutit aallartinneqarsimasut nutaat oqaluttuarineqarsinnaallutik.
Meeqqat pillugit Isumaqatigiissut nunarsuaq tamakkerlugu meeqqanut 18-it inorlugit ukiulinnut atuuppoq, aammalu meeqqamut pitsaanerpaaq aallaavigalugu.
Meeqqat pillugit Isumaqatigiissut sisamanngorlugu agguataarneqarpoq:
- Meeqqap tunngaviusumik pisinnaatitaaffii
- Meeqqap ineriartornissaminut pisinnaatitaaffii
- Meeqqap illersorneqarnissaminut pisinnaatitaaffii
- Meeqqap aalajangeeqataasinnaanerminut pisinnaatitaaffii
Naalagaaffiit peqatigiivisa Meeqqat pillugit Isumaqatigiissutaa tamakkiisoq uani atuarsinnaavat.
Naalagaaffiit peqatigiivisa Meeqqat pillugit Isumaqatigiissutaa naalisagaq uani atuarsinnaavat