Inissiineq
Inissiineq
Meeqqat inuusuttullu ilaat angerlarsimaffimminni najugaqarsinnaanngillat. Tamanna amerlasoorpassuarnik peqquteqarsinnaavoq. Meeqqat inuusuttullu angerlarsimaffimminni najugaqarsinnaanngikkaangamik, angajoqqaarsiaminni meeqqanulluunniit ataatsimoorluni inissiami najugaqarsinnaasarput. Taanna ulloq unnuarlu paaqqinnittarfimmik taaneqartarpoq.
Oqimaassinnaasarpoq angerlarsimaffimmiit nuunnissaq, oqimaassinnaasarlunilu nutaami najugaqarnissaq nutaanik inuttalimmi. Tassanngaannaq amerlasuut takornartaalersarput malittarisassallu nutaat malitassat. Assut paatsiveerunnarsinnaavoq, aliasulersinnaavutit, qasusinnaavutit apeqqutissarpassuillu akissutissarserusussinnaavatit. Meeqqat allat nutaamut nuunnertik nuannarisinnaavaat. Imaassinnaavoq nutaami najukkami eqqisimanarnerusoq. Meeqqat inuusuttullu assigiinngitsorujussuarmik misigisarpaat. Meeqqat inuusuttullu angajoqqaavitik takunissaat pisinnaatitaaffigaat najugaqatiginngikkaluarunikkilluunniit. Qulakkeertariaqarporli takuneq meeqqanut innarliissutaassanngimmat. Assersuutigalugu aarlerinarsinnaavoq takugukkit ilinnut ajortumik pisoqarnissaa.
Inissinneqaruit kommuni ilinnut qanoq ilioriusissamik sanasussaavoq. Qanoq ilioriusissamik pilersaarut pilersaarutaavoq ukiut marlussuit siumut isigisoq sussanersutit. Tusarneqarnissat pisinnaatitaaffigaat qanoq ilioriusissaq sananeqalerpat.
Ulloq unnuarlu paaqqinnittarfiit
Malittarisassaqarpoq inersimasut soqqusaanersut soqqusaannginnersullu ulloq unnuarlu paaqqinnittarfimmi. Assersuutigalugu inersimasut persuttaaqqusaanngillat nuanniitsunillu ilinnut oqaloqqusaanatik. Sakkortuumik ilioruit tigummeqqusaavaatsit, inillu misissorsinnaatitaavaat isumaqarunik tigoqqusaanngitsumik tigusaqarsimasutit.
Misigisimaguit apeqqutitit iluamik akissutissarsinagit kommunimi sagsbehandlerernut (inersimasoq ilinnut ikiuisinnaasoq) saaffiginnissinnaavutit, nassuiaqqullugulu suut malittarisassaanersut.
Nalugukku kina oqaloqatigissanerlugu imaluunniit naammagittaalliorfigissanerlugu inissinneqarnernut, tamatigut SMS-ikkut siunnersuisarfia 1899 imaluunniit Tusaannga 801180 aperisinnaavat. MIO-mut aamma mailikkut mio@mio.gl saaffiginnissinnaavut imaluunniit telefonikkut 34 69 40.
Inunnut isumaginninnermut naammagittaalliorneq
Inunnut isumaginninnermut tunngassuteqartunik naammagittaalliorniaruit Isumaginninnermi Naammagittaaliuteqartarfik attavigisinnaavat. Isumaginninnermi Naammagittaaliuteqartarfik naammagittaalliortarfiuvoq assersuutigalugit inissiinerit, innarluuteqarneq, meeqqanut tapiissutit imaluunniit ineqarneq pillugit. Paasisaqarnerorusukkuit uani atuarsinnaavatit imaluunniit sianersinnaavutit telefonimut 32 80 33.
Ombudsmandimut naammagittaalliorneq
Ombudsmandi sulisoqarfiuvoq assersuutigalugu kommunit aamma Namminersorluni Oqartussani naalakkersuisoqarfiit inatsisinik malinninnissaanik sapinngisaminnillu pitsaanerpaamik sulinissaannik isumaginnittussaq. Isumaginninnermi Maalaarutinik Aalajangiisartutut maalaaruteqartarnertuulli Ombudsmandimut maalaaruteqartoqarsinnaavoq. Siullermilli Isumaginninnermi Maalaarutinik Aalajangiisartunut maalaaruteqartoqassaaq.
Inunnik isumaginninnermi maalaarutinut tunngassuteqanngitsut pillugit Ombudsmandimut maalaartoqarsinnaavoq. Assersuutigalugu tassaasinnaapput klassimi toqqissisimanarinngisami tassanngaannaq atualernissaq atuarfiup aalajangiusimappagu. Tassani klassimik atuarfiusussamik aalajangiinnginnermi malittarisassat tamarmik malinneqarsimanersut Ombudsmandip misissorsinnaavaa. Aamma tassaasinnaavoq hashitortoqarsimanersoq misissorniarlugu quumik misiliutissamik tigusisoqarnissaanik Ulloq Unnuarlu Paqqinnittarfik piumasaqarpat. Taamatut pisoqartillugu Ulloq Unnuarlu Paaqqinnittarfik ernumanissamut pissutissaqarnersoq malittarisassallu malinneqarsimanersut Ombudsmandip misissorsinnaavaa. Meeqqat inuusuttullu Ombudsmandimut sunik maalaaruteqarsinnaanerannik arlalinnik assersuutissaqarpoq.
Aamma Kalaallit Nunaata Ombudsmandianut saaffiginnissinnaavutit. Inuit tamarmik Ombudsmandimut naammagittaalliorsinnaapput kommuniminni imminnut aaliangiunneqarsimasut pillugit. Naammagittaalliuteqarneq uani atuarsinnaavat imaluunniit unga sianerlutit 32 78 10.
Najortimiit ikiorneqarneq
Aamma meeqqat illersuisuannit Najorti-mit ikiorneqarsinnaavutit. Najorti tassaavoq inersimasoq suna kissaatiginerpaanerlugu inersimasunut oqaluttuarnissarnut ikiuussinnaasoq. Najorti-mik paasisaqarnerorusukkuit uani atuarsinnaavat
Meeqqat inuusuttullu isummatik oqaatigissallugit tusarneqarnissartillu pisinnaatitaaffigaat.
Meeqqat inuusuttullu kommunimiit ikiorneqarnissaminnut pisinnaatitaapput. Kommunip qulakkeertussaavaa ajunngissasutit najugaqarfigiligassarni.