MIO aamma meeqqat ilanngutitinneqarnissaat
Meeqqat tamarmik pisinnaatitaaffeqarput tamannalu ilutigalugu meeraqatimi pisinnaatitaaffii aamma ataqissallugit akisussaafeqarpoq.
Eqqumaffigiuk meeqqanik sullissisut tamarmik meeqqanik pinerliisimannginnermut uppernarsaammik immersuisussaammata. Malittarisassat uani atuarneqarsippaapput immersugassarlu uani pissarsiarineqarsinnaalluni.
MIO aamma Nalaagaaffiit Peqatigiit Meeqqat Pisinnaatitaaffii pillugit Isumaqatigiissut
Meeqqat Illersuisuat aamma Meeqqat pisinnaatitaaffii pillugit sullissivik MIO, meeqqat inuusuttullu inuuniarnermikkut atugarisaat pitsanngortinniarlugit suleqataassooq nukittorsaaqataallunilu, Naalagaaffiit Peqatigiivisa meeqqat pillugit nalunaarusiaata tamakkiisumik atuutsilernissaa suliniaqataaffigissallugu. Tamanna pissaaq meeqqanik inuusuttunillu peqataatitsinikkut aammalu assigiinngitsutigut innuttaasuni meeqqat inuusuttullu pinerullugit paasissutissanik katersinikkut.
Meeqqat Illersuisuat inuiaqatigiinnut, ilaatigut angajoqqaanut, sullissisunut aammalu aalajangiisartunut taakkartortassuai atugassarititaasut artornartut aammalu meeraalluarnissaraluamut aporfissaasinnaasut, meeqqat inuusuttullu namminneq oqaasii aallaavigalugit.
Meeqqat Illersuisuat attaviitsutut annertunerpaamik sulivoq aammalu politikkikkut attaviitsuulluni. Meeqqanut aammalu inuusuttunut tunngasut aaqqittariallit taakkartorsinnaavagut, aningaasartuutissat, sulisoqarniarneq aammalu allat eqqarsaatigisassat salliuteqqaarnagit.
Meeqqanit aammalu inuusuttunit ilisimasat ataani allassimasut tunngavigalugit pilersinneqartarput:
- immikkut oqaloqatigiilluni
- immikkut ilisimasallit , meeqqat ataatsimeeqatigisarlugit pisat assigiinngitsut eqqarsaatigalugit
- immikkut ilisimasallit ataatsimiitillugit, meeqqat najugaanni ataatsimeeqatigitsiartarlugit
- ataatsimiinnerit isummersornerillu Meeqqat Isummersorfianneersut Nakuusa-meersullu peqatigalugit
- qarasaasiaq aqqutigalugu meeqqat akisassaat apeqqutit, sapinngisamik meeqqanik inuusuttunillu sinniisuulluarsinnaasunik aallaavilik
Oqaloqatigiinnerit aammalu ataatsimiinnerit ornigulluni imaluunniit atortorissaarutit aqqutigalugit pisinnaavoq, assersuutigalugu MIO-p nittartagaatigut allaqatigiilluni imaluunniit Skype aqqutigalugu. Meeqqat Illersuisuata ukiumut Kalaallit Nunaanni piffiit 4-6-it pilersaarusioriikkamik tikeraartassavai imaluunniit allanik piffinni siunertaqarnikkut.
Meeqqat Illersuisuata meeqqat tamaasa Kalaallit Nunaanniittut sullippai, suiaassusaat, suminngaanneerneri imaluunniit oqaasii suugaluarpataluunniit. Meeqqat inuusuttullu oqaatsit Meeqqat Illersuisuannut oqaloqatiginninnermi atorusunnerusatik atorsinnaavaat.
Sullinniakkat eqqarsaatigalugit meeqqanut tulluuttumik attaveqartarpugut, siunissaq eqqarsaatigalugu attaveqaqatigiinneq mobilit video-isigut/qarasaasiakkut oqaluttualiakkut, assitigut, titartakkatigut, ilusilersukkatigut assigisaannilluunniit isikkoqarsinnaavoq.
Naalagaaffiit peqatigiivisa Meeqqat pillugit Isumaqatigiissutaa tamakkiisoq uani atuarsinnaavat.