Avanersuarmi piniartut ilaqutariit annikilliorput
Piniartut arlallit ilaqutaalu Avanersuarmi, Qaanaami, Siorapalummi aamma Savissivimmi annikilliulersimapput qaammaterpaalussuarni immap sikua qerinngitsoorneratigut piniarnissamik periarfissaarummata. Meeqqat Oqaaseqartartuata Naalakkersuisut kajumissaarpai piniartut ilaqutariit silaannaap allanngorneratigut annikilliulersimasut isumageqqullugit.
Nunatta avannaarsuuani immap sikuata amigaataalersimanerata kingunerisimavaa inuussutissarsiutigalugu piniartut qaammaterpassuarni piniariarsinnaanngitsut. Immap sikua amigartillugu piniarnissamik periarfissaqanngilaq, tamanna pissutigalugu piniartut isertitamikkut inuussutissatuatik annaasivaat, tamannalu meeqqanut kingunerluppoq.
”Ajornartoorfimmik nalaattoorsivugut. Ilaqutariit annertuumik annikilliorput, ilaqutariillu killissartik qaangerujussuaqqavaat, tassami meeqqatilluunniit nerisassaqartinngilaat. Silaannaap ingasattajaartumik allanngoriartornerata inuiaqatigiinnut tamanut akornutaalerpoq, taamaalineranilu piniartut ilaqutariit immikkut ittumik eqqugaapput, tassami meerartai taamaalillutik ajornerpaamik eqqugaapput”, taamatut oqaaseqarpoq Meeqqat Oqaaseqartartuat Aviâja Egede Lynge.
Meeqqat Oqaaseqartartuat piniartumik eqqugaasimasumik ilisimasaqarpoq, kommunemut ikiorserneqarnissamik qinnuteqaraluarsimasoq, kisiannigooq suliffissarsiortuunngimmat itigartitaasimavoq.
”Meeqqat tamarmik, angajoqqaavi piniartuuppata piniartuunngippataluunniit, pisinnaatitaaffigivaat ajunngitsumik toqqissisimanartumillu meeraassallutik, annikillioratik. Taamaattumik Naalakkersuisut kommunillu sakkortunerpaamik kajumissaarpakka ilaqutariit isumageqqullugit, pineqartullu peqatigalugit ajornartorsiutit aaqqeqqullugit, meeqqammi kaallutik innartussaanngillat”, Meeqqat Oqaaseqartartuat Aviâja Egede Lynge oqarpoq.