MIO periusissiamik nutaamik saqqummersitsivoq
Meeqqat pisinnaatitaaffiinut sullissiviup MIO-p ukiunut tulliuttunut periusissiani nutaaq saqqummerseqqammerpaa. Periusissiami meeqqat inuusuttullu inuunerminnut pingaarutillit pillugit sammisani aalajangigassanilu akuliutsinneqarnerunissaat tunngavissinneqarpoq.
”Ukiuni arfineq-pingasuni kingullerni MIO-p sulinera meeqqat atugaasa nakkutigineqarnissaannut tunnganeruvoq, tamatumanilu MIO-p angalanermi nalunaarusiai pingaarnertut nakkutiginninnermi sakkussatut atorneqarput. Ingerlatsinermik ukkatarinninnilluta sulivugut innuttaasunillu piviusumik akuutitsinissaq pingaartissimallutigu – tamatumani akuutitsineq oqaasiinnaanani timitalerneqarpoq meeqqat inuusuttullu pissutsit piviusut inuuffigisaat aallaavigalugit toqqaannartumik oqaloqatiginerisigut. Meeqqat inuusuttullu tusarnaarnissaat tamatumalu kingorna oqariartuutaasa politikerinut inersimasunullu allanut aalajangiisartunut ingerlateqqinnissaat ukkatarisimavavut”, taama Meeqqat Illersuisuat Aviâja Egede Lynge oqarpoq.
MIO ukiuni arfineq-pingasuni kingullerni sineriak tamakkerlugu angalasarsimavoq meeqqanillu inuusuttunillu ilisimasanik naleqaqisunik katersilluni, taakkunanngalu ersarissumik takutinneqarpoq FN-ip meeqqat pillugit isumaqatigiissutaanni malittarisassat 19-iusut Kalaallit Nunaanni eqquutsinneqanngitsut. Ukiuni arfineq-pingasuni misilittakkat angalasarnerillu tunuliaqutaralugit MIO-p piffissami periusissiorfimmi tulliuttumi meeqqat inuusuttullu inuunermi atugaat pillugit ilisimasanik katersinermi periutsinik nutaanik ineriartortitsinissaq, nakkutilliinermi sakkunik pitsanngorsaanissaq kiisalu meeqqat pisinnaatitaaffiisa pitsanngorsarniarneranni meeqqanik, inuusuttunik inersimasunillu akuutitsinissaq siunnerfigineqarput.
MIO-p piffissami tulliuttumi sinerissami 40-riarluni angalasarnermit ilisimalikkat tunngavigalugit meeqqat inuusuttullu tamarmik inuunermi atugarisaannik pitsanngorsaanissamut aqqutissiuussinissaq anguniagarilissavaa. Ilisimasat taakku ilisimasanik allanik, meeqqat pisinnaatitaaffiinik pitsaanerusumik eqqortitsinissamut qulakkeerinninnissamut pisariaqartunik, ilaartorneqassapput. MIO ilisimasanik nakkutiginninnermilu sakkussanik ineriartortitsissaaq, aaqqiissuussaatitsissaaq ilaliisassallunilu taamaalilluni meeqqat tamarmik toqqissisimasumik pitsaasumillu inuuneqaleqqullugit aaqqiissutissat pitsaanerpaat pillugit uparuaasoqarlunilu siunnersuisoqarsinnaaniassammat.
”MIO piffissami tulliuttumi immikkut aallutaqalerpat imaanngilaq meeqqat inuusuttullu tusarnaarunnaassagigut.
Taamaanngilluinnarpoq! Meeqqat inuusuttullu namminneq inuunertik pillugu immikkut ilisimasaqartuupput, periusissiamilu nutaanik ukkataqalernermi MIO-p meeqqat inuusuttullu sammisani aalajangiussanilu inuunerannut sunniuteqartuni akuutinneqarnerunissaat tunngavilersortassavaa. Meeqqat nipaat ilisimasanik nutaanik ineriartortitsinermi aamma meeqqat inuusuttullu pillugit iliuutsinik timitalersuinermi akuutinneqartassapput. Suleqqinnissatsinnut qilanaaqaagut”, taama Aviâja Egede Lynge oqarpoq.
Periusissiaq 2025-mut atuuppoq MIO-llu nittartagaani atuarneqarsinnaalluni: https://mio.gl/mio-pillugu/mio-p-pilersaarusiaa/
Asannittumik inuulluaqqusillunga
Med Kærlig hilsen
Aviâja Egede Lynge
Meeqqat Oqaaseqartartuat
Børnetalsmand