Meeqqat Oqaaseqatartuat: ”Peqqinnissaqarfiup sumiginnaanera meeqqat inuunerannik naleqarpoq!”

Tusagassiorfiinnut nalunaarut

 

Peqqinnissaqarfiup iluani meeqqanut suliassarpaalussuit ernumanartut misissoreerlugit Meeqqat Oqaaseqartartuat mianersoqqusivoq. Meeqqat peqqinnissap tungaatigut pisinnaatitaaffiit eqqortinneqanngillat, aamma angajoqqaajusut system’miit sumiginnagaallutik misigisimapput.

 

MIO inuit pisinnaatitaaffiisa inatsisilerituuat suleqatigalugu peqqinnissamik suliamik tunngavilimmik meeqqat Nunatsinni qanoq pineqartarnerat notatiliarisimavaa. Notatimi ilaatigut aallaavigineqarpoq peqqinnissaqarfiup iluani meeqqanut tunngasunik suliassat ernumanartut arlallit, MIO´miit allagaatinik takunnissinnaatitaaneq atorlugu paasisimasai. Notatimik siunertaa tassaavoq meeqqat peqqinnissamik pisinnaatitaaffii ilumut malinneqarnersut nalilersorniassallugu aamma tassunga tunngatillugu innarliisoqarsimanersoq takuniassallugu. Suliassat katersorneqarsimasut nalilersorneqarsimapput Naalagaaffiit Peqatigiit Meeqqat Isumaqatigiissutaannut tunngatillugu kiisalu Nunatsinni peqqinnissaqarnikkut inatsisinut naleqqiullugu.

 

”Meeqqat Oqaaseqartartuattut ingerlaavartumik angajoqqaanik oqaloqateqartuaannarpunga, peqqinnissaqarfimmiit sumiginnagaasimasutut misigisimasunik, taamaattumik pisariaqartilersimavara pingaartillugulu suliassanik ernumanartunik ersarinnerusumik misissuissallunga nalilerusullugu ilumut meeqqat pisinnaatitaaffiinut tunngatillugu kinguneqarsimanersut. Misissuinerput ajoraluartumik uppernarsarpaa, meeqqat peqqinnisamik pisinnaatitaaffii ilungersunartumik innarlerneqartarsimasut. Ernumatsappunga assut meeqqat peqqinnissaqarnerup iluani sumiginnagaasimasut pillugit. Ilaatigummi allaat toqumik kinguneqartarsimammat. Taamatummi pisoqaqqusaanngilaq!” Meeqqat Oqaaseqartartuat Aviâja Egede Lynge oqarpoq.

 

 

Naalagaaffiit Peqatigiit Meeqqat Pillugit Isumaqatigiissutaanni Artikel 24´mi Nunarput pisussaaffiligaavoq qulakkiissallugu meeqqanut tamanut peqqinnissaqarnikkut qaffasinnerpaamik anguniagaqassalluni, tamannalu ilutigalugu napparsimalluni katsorsartinnissamut periarfissinneqartussaammata, nakorsanit ikiortissinnaasariaqarlutik peqqinnissaqarnikkullu isumassorneqarsinnaassallutik. MIO´p misissuinerata takutippaa, meeqqat peqqinnissamik pisinnaatitaaffii tamatigut malinneqartarsimanngitsut. Misissuinerup ilanngullugu takutippaa, angajoqqaat meeqqatik peqqissusaat pillugit ernumanerat ilungersunartutut tiguneqanngitsut – imaassinnaalluni meeqqanik misissuinissamik peqqinnissaqarfimmi nakorsaqarnikkut piginnaasatigut katsorsaanissamullu amigarnerat patsisaaqataasoq.

 

”Manumina toqqusaap qinersimini pilatsittareerluni toqusup pillugu maannakkorpiaq suliassatut ingerlaartoq, tassaavoq assersuut annilaarnartoq, tassami peqqissaqarnikkut katsorsartinnermik kukkunikkut ajutoornertut assersuutaammat. Ilumut eqqarsarnaqaaq, peqqinnissaqarnikkut system´eqarsimagatta ima ajortigisumik, allaat niviarsiaraq arfiniliinnarnik ukiulik aanaarluni toqusinnaammat naak naliginnaasumik pilatsissimalluni peqqinnissaqarnikkut sulisunik alakkarneqaraniluunniit! Angajoqaat arlaleriarlutik pinasuartumik ajutoortoqartillugu saaffiginnittarfik (skadestue) arlaleriarlugu attavigisimagaluarpaat niviarsiaqqap toqunissaa ullualunnik sioqqullugu, saaffiginninnermilu annertuumik ernumanertik oqaatigisarsimallugu, niviarsiaqqap peqqissusaa eqqarsaatigalugu, ilami aattalimmik meriartarsimammat, taamattoq itigartitaasarsimallutik. Meeqqat Oqaaseqartartuattut nalilerpara, pisimasumi uani meeqqap peqqinnissamik pisinnaatitaaffiini ilungersunartumik innarliisoqartoq, aamma meeqqap tungaaniit inissisimaneq ilannguneqarsimanngimmat. Suliassani allani MIO´p misissuinermini aamma assingusumik pisoqartarsimavoq. Angajoqqaat itigartitaasutut susinnaajunnaartutullu misigisimapput, nassuertariaqarpugullu, meeqqanut peqqinnissaqarnikkut aaqqissuussinerput peqqinnissamik katsorsaanissaminnut suliassartik artorsimagaat, naak meeqqat pisinnaatitaaffigigaluaraat peqqinnissaqarnikkut qaffasinnerpaamik pineqarnissartik. Ilaqutaasunut misiginneqataanera apuukkusuppara, neriuppungalu naak meerannguit utertissinnaanngikkigut, eqqortoq piumaartoq, tassa qulakkeerniassallugu taamatut pisoqanngisaannarnissaa”, Aviâja Egede Lynge oqarpoq.

 

MIO´p notatia meeqqat Nunatsinni peqqinnissaqarnikkut suliaritittarnissaat pillugu innersuussutinik arlalinnik tikkuartuivoq, taakkuami peqataasinnaammata meeqqap peqqinnissamik pisinnaatitaaffiinik malitseqarnissamik nukittorsaasinnaammata:

 

• Innersuussutaasut
• – Meeqqat peqqinnissaqarfimmiit nukittorsarneqarnissaat, meeqqap nammineq paasinnittaasia najoqqutaralugu napparsimaviit nalunaarsuiffiini ersersinneqarluni
• – Malugeqqullugu meeqqanik misissuisoqartillugu piffissatigut innersuussutigineqartut najoqqutarineqartut iluani ingerlateqqullugit.
• – Meeqqat peqqinnissaqarfimmi naligiimmik suliaritinnissaat qulakkeerumallugu nakorsaqarnikkut piginnaasat aqqutigalugit qulakkeerneqarnissaat (pædiater)
• – Meeqqanut illoqarfiit avataaniittunut peqqinnissaqarnikkut neqeroorutaasut misissorneqarnissaat
• – Napparsimasut inatsisitigut innarlitsaalisaanissaat kukkusumik suliaritissimanermi taarsiivigitinnissaq anguneqassasoq inatsisit nutarterneqarnerisigut
• – Napparsimasut inatsisitigut innarlitsaalisaanissaat napparsimasutut naammagittaalliornissami tikikkuminartumik ajornanngitsumillu aaqqissuussinikkut
• – Napparsimasut inatsisitigut innarlitsaalisaanissaat naammagittaalliornissamik oqitsunnguamik takujuminartumillu periarfissiinikkut
• – Peqqinnissaqarfimmi katsorsaasoqartillugu napparsimasut, peqqinnissaqarfimmilu sulisut, inatsisitigut innarlitsaalisaanissaat katsorsaanermik ilitsersuutit inuiaqatigiinnut tamanut saqqummersitat, nutartikkallu
• – Nalunaarsuisussaatitaaneq ukkatarineqarnerunissaa anguniassallugu, taamaalilluni napparsimasup nalunaarsuivii katsorsaanermik eqqortumik assiliartaliinissaa anguneqassammat.

 

 

Notat tamakkiisoq MIO´p nittartagaani uani atuarneqarsinnaavoq.

 

Asannittumik inuulluaqqusillunga

Med Kærlig hilsen

 

Aviâja Egede Lynge

Meeqqat Oqaaseqartartuat

Børnetalsmand