Meeqqat Ulluannut atatillugu Meeqqat Oqaaseqartartuata, Aviâja Egede Lyngep, Inatsisartut upernaakkut ataatsimiinnerminni meeqqat pillugit pingaarnersiuinnginnerat ernumanartillugu oqaatigaa. Tassungalu peqqutaavoq oqaluuserisassani meeqqanut attuumassusillit marluk peerneqarsimammata.
Inatsisartut upernaakkut ataatsimiinneranni meeqqat pillugit oqaluuserisassat marluk peerneqarsimasut tamanut saqqummiunneqarpoq. Tamannalu Meeqqat Oqaaseqartartuanut, Aviâja Egede Lyngemut, ernumatitsivoq, oqaatigaalu politikkitigut meeqqat salliunneqannginnerat isornartorsiugassaasoq akuerineqarsinnaanngitsorlu.
”Politikkitigut sulinermut atatillugu inatsisiliornermi meeqqat inuusuttullu salliunneqannginneri akuerineqarsinnaanngilaq. Inuiaqatigiittut meeqqat pisinnaatitaaffiisa malinneqarnissaat pisussaaffigaarput, Inatsisartullu sinaakkutit pilersinneqarnissaat akisussaaffigaat. Taamaattumik ernumanarpoq Inatsisartut oqaluuserisassanik pineqartunik qulakkeerinnittussaagaluartunik peersinerat,” taama oqarpoq, Meeqqat Oqaaseqartartuat, Aviâja Egede Lynge.
Meeqqat Oqaaseqartartuata oqaatigaa ataatsimiisitsinermi qaangiuttumi meeqqat pillugit oqaluuserisassat annikereersimasut.
”Meeqqat pillugit oqaluuserisassat annikereertigisut, suli piianerat ernumanartitsivoq, suunukua salliunneqartut? Meeqqat ulloqartitsineq takussutissaannaava? Politikerit meeqqanik salliutitsinissaat eqqarsaatigitikkusupparput, meeqqanullu pitsaanerpaamik iliuuseqaqqullutigit. Meeqqat pisinnaatitaaffii eqqarsaatigineqaannaratik pingaartinneqassapput,” taama oqarpoq, Meeqqat Oqaaseqartartuat, Aviâja Egede Lynge.
Oqaluuserisassani peerneqartuni siulleq siusissukkut iliuuseqarnermut attuumassuteqarpoq, tassani tunngaviusumik ujartuinikkut periuseqarnissaq kiisalu pinaveersaartitsinissaq aallaavigalugu oqallittoqartussaagaluarpoq (oqaluuserisassaq nr. 36), aappaannilu ulloq unnuarlu angerlarsimaffiit perorsaanermilu periutsit sorliit Kalaallit Nunaannut naleqquttuunersut oqaluuserineqartussaagaluarluni (oqaluuserisassaq nr.55).
Asannittumik inuulluaqqusillunga
Med Kærlig hilsen
MIO – Meeqqat Pisinnaatitaaffiinut Sullissivik
Saaffissaq:
Rasmine Hansen, sekretariatsleder
rasmine@mio.gl