MIO-p inersimasut tamaasa meeqqat pisinnaatitaaffii pillugit apeqqutinik immersugassamik akiseqqullugit kajumissaarpai
Meeqqat pisinnaatitaaffii pillugit inersimasut sunik ilisimasaqarpat? Novembarip 22-anni MIO-p inersimasunut tamanut apeqqutinik imersuiffissaq saqqummersissavaa meeqqat pisinnaatitaaffiinik inersimasut paasinnittaasiat pillugu ilisimasanik katersiumalluni.
MIO-p ukiuni arfineq-pingasuni kingullerni sinerissami tamarmi illoqarfiit nunaqarfiillu 40-t tikeraarsimavai meeqqallu, ilaqutariit, sulisut innuttaasullu allat meeqqat pisinnaattitaaffii pillugit oqaloqatigisimallugit. MIO-p misigisimavaa meeqqat pisinnaatitaaffitik pillugit ilisimasaqarnerulersimasut. Tamatuma saniatigut MIO-p misigisimavaa inersimasorpassuit meeqqat pisinnaatitaaffii pillugit ilisimasanik amigaateqanngikkunik meeqqat pisinnaatitaaffeqarnerat qanoq isumaqartoq paatsoorsimagaat.
”Inersimasut akornganni amerlasuunit paatsoorneqartartoq tassaavoq meeqqat pisinnaatitaaffeqarnerisa namminneq aalajangiisinnaatitaanerattut paasineqartarnera. Inersimasut MIO-mut aperisut meeqqat pisinnaatitaaffitik pissutigalugit inuiaqatigiinnik ilumut aqutsisuusinnaanersut naapikulasarpavut. Aamma angajoqqaat meeqqat pisinnaatitaaffii pissutigalugit meeqqaminnut killiliinissaminnik sapernartitsisut naapittarpavut. Paatsoornerit taamaattut MIO-p aaqqikkusuppai. Meeqqat pisinnaatitaaffii meeqqanut illersuutaasussaapput inersimasut akisussaaffiannik arsaarinnittussaanatik. Meeqqat pisinnaatitaaffii meeqqat aalajangiisussaanerattut paasisariaqanngillat, kisianni meeqqat namminerminnut tunngatillugu suliani tusaaneqarnissamik pisinnaatitaaffeqarnerattut paasisariaqarput”, Meeqqat Oqaaseqartartuat Aviâja Egede Lynge taama oqarpoq.
Meeqqat pisinnaatitaaffiinik inersimasut paasinnittaasiat pillugu apeqqutinik immersuiffissaq FN-ip meeqqat pillugit isumaqatigiissutaasa inersimasunut siaruarternissaannut atatillugu suliniutaavoq annertooq. Ukioq manna MIO ilaatigut kujataaniippoq suliniummut ilisimasanik pitsaasunik katersiniarluni. Apeqqutinik immersuiffissaq nuna tamakkerlugu meeqqat pisinnaatitaaffiinik inersimasut paasinnittaasiat pillugu ilisimasanik katersuisitsissaaq. Ilisimasat taakku ilaatigut inersimasunut tulluarsakkanik meeqqat pisinnaatitaaffii pillugit atortussanik iliuutsinillu ineriartortitsinissamut atorneqassapput.
”Uagut inersimasutut akisussaaffigaarput meeqqat pisinnaatitaaffiisa eqqortinneqarnissaat, kisianni meeqqat pisinnaatitaaffii pillugit inersimasut ilisimasanik amigaateqarunik imaluunniit qanoq isumaqarnerannik paatsuuisarunik taava meerartavut illersorneqarnavianngillat. Taamaattumik apeqqutinik immersuiffissaq inersimasut nipaannik isiginnittaasiannillu ersersitsissaaq, apeqqutinillu immersuiffissap immersorneratigut meeqqat pisinnaatitaaffiisa nukittorsarneqarnissaannut inersimasut ikiuussinnaapput”, Aviâja Egede Lynge taama oqarpoq.
Apeqqutinik immersuiffissaq uani takuneqarsinnaavoq.
Apeqqutinik immersuiffissamut peqataanikkut iPhonemik Pisiffimmit tapersiissutitut tunniunneqartumik eqquisinnaavutit.
Asannittumik inuulluaqqusillunga
Med Kærlig hilsen
Aviâja Egede Lynge
Meeqqat Oqaaseqartartuat
Børnetalsmand