Sunamita siulliussava? Meeqqanut pitsaanerpaaq imaluunniit aningaasatigut sipaarutissat?
Inatsisartut oktoberip ulluisa 11-ani immikkut ilisimasalinnik suleqatigiissitaliorniarlutik eqqartuilerput, suleqatigiissitap innersuussutigissavaa, meeqqat angerlarsimaffiup avataani inissittartunut tunngatillugu aningaasartuutaasartut qanoq ilillugit appartinneqarsinnaanersut. MIO´p qinikkanut kajumissaarivoq aallaavigeqqullugu meeqqamut pitsaanerpaasussaq toqqaqqullugu aningaasartai pivallaarnagit.
Meeqqat angerlarsimaffiup avataanut inissinneqartartut aningaasartuutaat qaffakkiartorput tamannalu kommunit aningaasanik atuinerannut annertuumik sunniuppoq. Tamannarpiaq aallaaviuvoq Inatsisartuni immikkoortup 111 massakkut ukiaanerani ataatsimiinnermi eqqartorneqalerpat. Siunnersuutigineqarsimavoq immikkut ilisimasalinnik suleqatigiissitaliortoqassasoq, innersuussutiginiassammassuk angerlarsimaffiup avataani inissiisoqartillugu aningaasartuutit annikillisaqqullugit. Inatsisartunut siunnersuutigineqartumi allaqqavoq innersuussutigineqartut meeqqat ineriartornerannut, atugarissaarnerannut aamma eqqartuussinikkut isumannaatsuunissamik ajortumik kinguneqassanngitsoq. Taamaattoq Meeqqat Illersuisuat Aviâja Egede Lynge isumaqarpoq, oqallinneq killormut saatsillugu sammisariaqartoq
”Meeqqat pisinnaatitaaffiiniit isigalugu ukkatarigutsigu taava meeqqamut pitsaanerpaaq tamatigut siulliunneqartussaajuaannarpoq imaanngitsoq aningaasartuutit qaffakkiartortut pingaarnerusutut inissinneqassasut. Aallaavittut isigalugu meeqqat angajoqqaaminnit avissaartitaasussaanngillat, naak immikkut pisoqartillugu pisariaqarsinnaasartoq. Tamanna pissutigerpiarlugu suleqatigiissitaq immikkut ittumik ilisimasalinnik inuttaqartussaq ukkatarisariaqarpaat, qanoq ililluta ilaqutariit nukittorsarsinnaanersut, meeqqammi amerlanerusut angajoqqaatillu sinaakkusiortariaqarmata toqqissisimanarnerusumik. Aningaasat koruuninngorlugit oorinngorlugillu immikkit ittumik ilisimasalinnut aallaavittut oqallisigineqassappata, taava nalorninarsivoq, ilumut meeqqamut pitsaanerpaasussaq pineqassanersoq,” taamatut oqaaseqarpoq Meeqqat Illersuisuat Aviâja Egede Lynge.
Isiginniffik alla pingaarutilik tassaavoq meeqqat nammineq nipaat. Naalaagaaffiit Peqatigiit artikel´ani 12 malillugu pisinnaatitaaffeqarput namminerpiaq isumartik annissinnaallugu aamma pissutsinut namminerminut tunngasutigut akulerutsinneqartariaqartut. Tamanna pissutigalugu meeqqat isumaat asuliunngitsumik akulerutsinneqartussaapput, meeqqat angerlarsimaffiisa avataatigut inissiisarneq pineqartillugu.
”Meeqqat namminerminut tunngatillugu suliaqartoqartillugu allamut illuaqqajaaneq ingatsikkaluttuinnarpoq, naak meeqqat nammineq inuunerminnut ilisimatuujusut. Immikkut ilisimasallit suleqatigiissitaanni suliaqartoqartillugu meeqqat puigugaasariaqanngillat angerlarsimaffiup avataani inissiisarnermi aningaasartuutit eqqartorneqalerpata. Sipaarniartoqalersillugu pingaarnersiuisoqartuaannarpoq, pingaarnersiuinerillu meeqqanut pineqartunut kingunerlutsitsisussaavoq, uanilu pineqartut tassaallutik meeqqat angerlarsimaffiup avataani inissitat. Qinikkat sakkortunerpaamik kajumissaarpakka meeqqat tungaaniit isigalugu eqqartorneqartussap eqqarsaatigineqaqqullugu, Inatsisartuni siunnersuut eqqartulerunikku”,
Aviâja Egede Lynge oqarpoq.
Asannittumik inuulluaqqusillunga
Aviâja Egede Lynge
Meeqqat Oqaaseqartartuat
Børnetalsmand