Ikiortikkumalluni suaaruteqarneq ajunngitsup tungaanut alloriarneruvoq

MIO Qeqqata Kommunia nersualaarpaa, nassuermat Meeqqanut tunngatillugu ikiortittariaqarluni.

 

Ukiorpaalunngortuni ilisimaneqareerpoq, kommunit meeqqanut tunngasut kivissallugit ajornakusoortikkaat, tamatumani immikkut pineqarluni inunnik isumaginninnikkut tungasutigut. Tamanna pissutigalugu ajunngitsup tungaanut alloriartoqalersoq malunnarsivoq, tassami Qeqqata Kommunia unneqqarissumik nalunaarpoq, meeqqanut tunngasut kisimiilluni suliarissallugit artoraa.

 

”Meeqqat Isumaqatigiissutaata allaaserisaata pingajuat oqarpoq, meeqqamut suna pitsaanerunersoq tamatigut alakkaqqaartassasoq, meeqqap inuunera pillugu aalajangiisoqassatillugu. Taamaattoq suliassat ingerlannginneri pissutaallutik meeraqarpoq ullut tamaasa naalliutsitaasumik. Taamaammat qunusuinneruvoq pisariaqarlunilu, Qeqqata Kommunianiit taamatut takutitsisoqarmat, takutinneqarmat meeqqap ikiortissalluni pisinnaatitaaffia siulliusariaqartoq”, taamatut oqarpoq Meeqqat Oqaaseqartartuat Aviâja Egede Lynge.

 

Qeqqata Kommuniata ilisimatitsissutigaa, inunnik isumaginnittunik socialrådgiverinik amigaateqarlutik aamma sulisunik allanik naleqquttunik amigaateqarlutik, atorfeqareersullu isornartumik suliaqarpallaarujussuareersut.

 

”MIO`mi isumaqatigiissutigaarput, kommunimi pisut immikkuuffarissutit oqaatigineqarsinnaanngitsut. Nuna tamakkerlugu inunnik isumaginnittunik socialrådgiverinik amigaateqarpugut sorsunnermilu tassanerpiaq kommunit kisimiittariaqanngillat. Tamanna nuna tamakkerlugu aaqqitassaavoq”, Meeqqat Oqaaseqartartuat isumaqarpoq.

 

MIO-mut saaffiginnissutit amerlanerpaat innuttaasuneersut, kommuninut tunngasuupput, kommunit kigaappallaartumik, kukkuluttorfioqisumik, suliassanilluunniit amigartumik suliarinnittarneranut tunngapput. Ukiuni pingasunngulersuni MIO tamakku pillugit suaaruteqarsimalerpoq.

 

Kommunini ullut tamakkiallugit sorsuuteqarput sulisussaminnik ujarlerlutik, kisianni piffissap annertunerpaami kommunit imminut unammillerpput. Tamanna meeqqanut iluaqutaanngilaq.

 

”Inunnik isumaginnittunik, suliassamillu suliarinnissinnaasunik amerlanerusunik neqeroortoqalernissaa ungasinnerusoq isigalugu aaqqitassaavoq, tamannalu malersorluarneqartariaqarpoq. Tamannali naammanngilluinnarpoq. Ullut tamaasa meeraq naalliutsitaavoq suliassamik suliarinnittussaqannginnera pissutaalluni, aamma ullut tamaasa inunnik isumaginnittunik socialrådgiverinik ulaperulunnerup soriarsinnaannginnerullu nassataannik naalliuttoqarpoq, tassami suliassat hunnorujulikkaat suliassaammata. Tamannalu pissutigerpiarlugu pilertortumik inerniliisoqartariaqarlerpoq, aqagumut utaqqissunneqarsinnaangitsumik”, MIO naggasiivoq.