Iliuusissani pilersaarummi imminut toqunnissamut pinaveersaartitsinermi ikiorsiineq ilaanngilaq – sooruna?
Naalakkersuisut nuna tamakkerlugu imminut toqunnissamik pinaveersaartitsinermik iliuusissamik pilersaarummik nutaamik siunnersuuteqarsimapput. Taamaattoq Meeqqat Illersuisuat isumaqarpoq, iliuusissatut pilersaarut inuusuttut ikiorneqarnissaminnut pisariaqartitsillutik suaaruteqarnerannut naapertuutinngitsoq, s.a. tarnikkut katsorsartinneq aqqutigalugu.
Naalakkersuisut siorna aalajangerpaat imminut toqunnissamik pinaveersaartitsinikkut iliuusissamik pilersaarutip nutaap suliarineqarnera kinguartinniarlugu, pissutigalugu MIO´p iluarsartuullugu pilersaarusiaaniit Qamani´miit inuusuttut nipaat siunnersuutaallu ilanngunniassamata. MIO´p september 2022`mi nalunaarusiaq 40`nik siunnersuutinik imalik tunniuppaat kiisalu inuusuttut Naalakkersuisunut nalunaarutiginiagaat film´inngorlugu tunniunneqarluni. Pilersaarusiaq kinguartinneqaraluartoq inuusuttut nipaat ilanngunneqarpasissimanngillat.
”Imminut toqunnissamik pinaveersaartitsinermut iliuusissatut pilersaarummut pakatsivunga. Inuusuttut anniaataat atorfissaqartitaallu tusarnaarsimavakka. Inuusuttut saariarfissaarutivipput tarnikkut assigiinngitsutigut ikiortikkusullutik, aamma nakkariartornermini ikiortikkusupput aamma ikiorserneqarusupput. Iliuusissatut pilersaarummi tarnikkut ikiuineq sanilliunneqarpoq ”tarnikkut ikiueqqaarnermut”, aamma ukkatarineqanngivippoq arlaatigut ikiorsiisinnaanermik neqerooruteqarneq, s.a. tarnikkut katsorsartinneq imaluunniit qulequtaasup iluani arlaatigut nukittorsaaneq. Tamanna naammaginanngilaq. Inuusuttut nammineq oqarnerattut: ”Sooruna inuusuttunik ikiorsiiniarsarisugut imminut toqoriartareerpata aatsaat?”” Meeqqat Illersuisuat Aviâja Egede Lynge oqarpoq.
Naalakkersuisut iliuusissamik pilersaarusiornerminni takorluugaat tassaasimavoq qulakkiissallugu, meeraq kinaluunniit, inuusuttuuguni inersimasuugunilluunniit, imminut toqunnissamik eqqarsaateqarpat imaluunniit imminnut toqunissamik eqqugaappat, taava ikiortinnissamik pisariaqartitsinertik naapertorlugu ikiortittariaqarput. Siunertat ajunnginniartussat MIO malillugu iliuusissatut pilersaarutigoorlugu takuneqarsinnaanngillat, aamma MIO´p takorlooruminaatsippaa, iliuusissatut pilersaarut qanoq ililluni, massakkutut iluseqarluni Naalakkersuisut takorluugaattut piviusunngorsinnaanersoq.
”Iliuusissatut pilersaarutip malunnarsisinngilaa tarnikkut peqqiilliornikkut aamma ajoqusernermik kingunerlutsitsinikkut katsorsaasoqartariaqartoq, naak taamaaliorneq imminut toqunnissamik pinaveersaartitsinermi pingaarnerpaattut oqaatigisariaqartoq. Iliuusissatut pilersaarummi siunnersuutigineqarsimasut naammanngillat kisimiissinnaanatillu. Massakkut periarfissatuaavoq, imminut toquttartut amerlassusaat appartinniarutsigit, aamma naammanngilaq inuusuttut tarnikkut ikiueqqaarnermut pikkorissassallugit piumaffigalugillu imminut akisussaaqqullugit, iliuusissatummi pilersaarummi taamatut siunnersuutigineqarpoq. Imminut toquttarneq ukiorpassuarni nalaattuarnikuullugu kiisami aatsaat ilisimalersimavarput, inuusuttut nammineq isumaat malillugu, sunarpiaq amigaatiginerlugu misigisimanersut. Massakkut piffissanngorluinnarpoq tusarnaassallugit. Annaasaqaqqinnianngilagut, taamatut oqarpoq Aviâja Egede Lynge.
Meeqqat Illersuisuat inuusuttut sinnerlugit neriuppoq akisussaasut kajumissaarut asuliunngitsumik tigussagaat, aamma neriuppoq imminut toqunnissamik pinaveersaartitsinermut iliuusissatut pilersaarutitut missingersuutaasoq nalilersorneqaqqissasoq.
Iliuusissatut pilersaarut qanittukkut tusarniaassutigineqaqqammerpoq, 2021-llu tungaanut iliuusissatut pilersaarutaasimasoq taarsissavaa.
Asannittumik inuulluaqqusillunga
Med kærlig hilsen
Aviâja Egede Lynge
Meeqqat Illersuisuat
Børnetalsmand