Imigassamik atornerluinermi iliuusissatut pilersaarummi meeqqat eqqaamalaarisigit.
Inatsisartut majip 11`ani aalajangertussaavaat, ukiunut arlalinnut atuuttussamik, pisimasut piviusut naapertorlugit, imigassamik aalakoornartulimmik atornerluinermi pinaveersaataasussamik Naalakkersuisut suliareqqullugu peqquneqassasut. MIO´p ungasinnerusumut iliuusissatut pilersaarut siunnersuutaasoq iluaraa, Inatsisartunilu ilaasortat kajumissaarlugit meeqqat peqataatinneqarlutillu aallartinneraniit akuutinneqarnissaat eqqarsaatigeqqullugu.
Meeqqat 40 %-ii tikingajallugit ulluinnarni imigassamik atuisunik inooqateqarput, inersimasullu imigassamik atornerluinerat siunissamut meeqqanut ajoqutaalluinnartumik annertuumik sunniuteqarnerluttussaavoq. Tamanna pissutigalugu MIO isumaqarpoq ajunngitsuusoq imigassamik akiuiniarluni iliuusissatut pilersaarummik siunnersuuteqartoqarmat ukiunut arlalinnut atuuttussamik.
”Meeqqat amerlavallaartut imigassamik atornerluinerup kingunerisaannik ajoqusertartut amerlavallaarput, ajornartorsiutillu taamaattut kinguaariinnut arlalinnut ukiuni arlalinni ajoqusernermik kingunerlutsitsinnaapput. Taamaattumik nuannaarutissaavoq, Inatsisartut ungasinnerusumut isigalutik pinaveersaartitsinikkut iliuuseqarniarlutik pilersaarusiormata. Inersimasut imigassamik aalakoornartortalimmik ajornartorsiuteqaleraangamik patsiseqartuaannarpoq, aamma inersimasorpassuupput ajoqusernermik kingunerlutsitsinerminni ikiorneqanngisaannarsimasut. Ajoqusernermik kingunerlutsitsisimasorpassuit periarfissinneqarnissaat eqqarsaataaasariaqarpoq iliuusissamik pilersaarusiorluni, taamaaliornikkut inersimasut tarnikkut ikiortittariaqarnerminni pisariaqartitaat akuerisariaqarparput, tamaalillutalu qulakkeersinnaallutigu, ajoqusernermik kingunerlutsitsinerit meeqqanut ingerlateqqinneqassanngitsut” taamatut oqarpoq Meeqqat lllersuisuat Aviâja Egede Lynge.
Kisitsisit atorlugit nassuiaasiornerit takutippaat, inuppassuit imigassamik ajornartorsiortut meeraanerminni ajoqusernermik kingunerlutsitsisimasut, ajoqusernermillu kingunerlutsitsisimanerit taakkua kinguaariit tulliinut ingerlateqqinneqartarlutik. Imigassamik atornerluineq inuiaqatigiinni kikkunnut tamanut sunniuteqartarpoq, MIO´lu tamanna pissutigalugu isumaqarpoq, pingaaruteqartoq, innuttaasut ingerlaasissami peqataatinneqassasut.
”Ukiunut arlalinnut iliuusissatut pilersaarut iluatsissappat, imigassamik aalakoornartortalimmik akiuiniarluni, taava pingaaruteqarpoq, suliarinerani inuit pineqartut peqataatissallugit. Tassani ilaatigut pineqarput inuit imigassamik aalakoornartortalimmik atornerluisut, aamma pineqarput, inuit tamakkuninnga misigisaqapilussimallutik kingunerluutaannik inuusut, minnerunngitsumik meeqqat eqqarsaatigalugit. Tamakkua saniatigut aamma pingaaruteqarpoq, Naalakkersuisut aallaqqaammut pisuussutinik immikkoortitsissasoq iliuusissatut pilersaarutaasoq aningaasanik atuinissamut immikkoortitaqassasoq, tamannalu pisariaqartoq kommuneni tamani najugaqarfinnilu tamakkununnga suliaqartut aallaqqaammut qanimut suleqatigilluinnarnissaat.
Ungasinnerusoq isigalugu iliuusissatut pilersaarut annertuumik pisoqartitsivoq, uani taamaallaat pineqanngilaq, imigassat aalakoornartortallit saagut tunnuani toqqorterneqassanersut toqqorterneqassannginnersulluunniit” Meeqqat lllersuisuat Aviâja Egede Lynge oqarpoq.
Aalajangiiffigisassatut siunnersuut siullermeerluni suliarineqassaaq Inatsisartut upernaakkut ataatsimiinneranni majip ulluisa 11-ani 2023.
Asannittumik inuulluaqqusillunga
Med venlig hilsen
Aviâja Egede Lynge
Meeqqat Illersuisuat